Laburo España: 250.000 ofertas de empleo

Espezial 2: II Congreso de l'aragonés

Archibau en Opinions • Fecha: 11-07-2006 13:10:55

Meta: una Academia de l'aragonés para toz



Como ya sabez, a meta de tot este treballo de año y meyo ye establir una Academia que chunte a toz: sensibilidaz, asoziazions, administrazión y unibersidat.

RECONOIXIMIENTO

- Por agora, fueras d'a Sociedat Lingüistica Aragonesa, que no han quiesto fer parte d'a fundazión de l'academia, todas as sensibilidaz i son representadas. Encara que mesmo dentro de chuntos, bel personache sía dando ferrete y tal. Bueno, como diz o topico, esto ye normal d'os aragoneses, a incapazitat de plegar en acuerdos.

- Todas as asoziazions, fueras d'a devantdita SLA, fan parte d'a creyazión de l'academia. Muitas asoziazions de l'Alto Aragón, chen particular, foranos... lo podez beyer en www.laragones.com, escritors importans, filologos, estudians...



- As administazions son as que suposan a cara y cruz d'o prozeso. Muitos ayuntamientos y comarcas tanto de l'Alto Aragón como d'a resta d'a comunidat ha apoyau o manifiesto.
I hai chen que argumenta que apoyar un manifiesto no ye apoyar una academia... pues no ye o mesmo, prou que no, pero toz sabemos que ye un trango que nunca antes s'eba conseguiu. Reconoixer tanto como se diz en o manifiesto implica a predisposizión a reconoixer l'academia. Amás, cómo ban a reconoixer una academia antes de constituir-se? Ixe no ye argumento.

O punto malo: Si ayuntamientos y comarcas nos apoyan, o nuestro gubierno no reconoixe explizitamén l'academia.
Sobre iste tema, caldría parlar-ne muito. Nomás daré unas lineas ta que lo considerez:
*O gubierno ha estau incapaz de fer una lei de luengas en condizions.
*O gubierno ha estau incapaz de nombrar l'aragonés en o estatuto.
Pero:
*O gubierno no reconoixe l'academia en primeras. Si bien tot s'irá fendo.
*O gubierno ha dau muitos diners ta que se faiga o congreso, ha permitiu que se faiga en a suya siede: a DGA, y beyen con buena cara o prozeso y a futura academia.

Estoi que, malas que l'Academia prenzipie a treballar y se pueda abaluar a suya faina obchetibamén, as cosas serán más fázils.



- Por último, a Unibersidat ha rechazau por agora dentrar en l'academia. Esta meta yera cuasi imposible conoixendo a os "nuestros" catedraticos. Que cal recordar que no son de filolochía aragonesa sino d'hispanica. Y toz conoixemos de qué piet coixían... Puede estar que con más tiento s'ese lograu bella cosa, pero por agora no s'ha puesto. Ye probable que, si l'academia funziona correctamén, este tema se pueda soluzionar.

En resumen. No s'ha lograu tot o que s'esperaba, pero s'han conseguiu pasos increyibles nunca antes feitos. L'academia puede naixer con un apoyo de parlans d'aragonés materno nunca bisto y como una ferramienta normatiba con un reconoiximiento asoziatibo como cal. Yo creigo que ye millor para l'aragonés ir fendo chicoz trangos que no aturar un prozeso que, si no se culmina, suposa o caos y a muerte más amanada d'a luenga. O boto SÍ a l'academia, en este sentiu, ye a millor soluzión dentro d'a situazión actual de l'aragonés.

Escrito por Charrabís
(4) Comentarios • (0) Referencias • Binclo pernanén


Referencias (URL para referencias)


Comentarios

  1. Intresans reflexions. Encara que ixe esprito d'a elucubrazión ha estau pro negatibo. Beyer en chicoz detalles masiadas potenzialidaz.

    ¿Que nos han dixau a siede ta fer o congreso? ¿Qué han prometiu bellas perras ta la organizazión d'o congreso? Ixo a lo millor quiere dezir que o gubierno mas ta debán contará con nusatros.....

    Allora, a partir d'ixe barrunte, no fer cosa y prebar de posizionar-se millor. Y allora, como tos son posizionando-sen no se fa cosa y o gobierno se fa o longis. Esto zaguero no ye garra elucubrazión, sino que lo lebamos patindo lo menos 9 años (dende o dictamen d'a comisión).

    Asinas que muito tiento con redimensionar o peso de bels detalles.

    D'altro canto fas referenzia a la imposibilidat de plegar en pactos por parte de os aragoneses. Ixo choca de tot con altro topico d'Aragón: O Pactismo. Ye curioso, dos topicos d'Aragón, de tot contrarios.

    Bueno, a seguir asperando esta fito istorica. Entalto Charrabis!!!

    fablapensador — 11-07-2006 15:56:48

  2. Pero fablapensador, no sé, yo escribo ta toz, nomás ta ixos que nomás miran de "posizionar-se"... Consideraba que yera importán de fer beyer que no tot ye una calamidat. I hai ayuntamientos y comarcas que nos apoyan, y o gobierno encara que no explesamén.. pues no sé, bel apoyo i abrá si o congreso se fa en a DGA y nos dan diners, no? Prou que un apoyo minimo y mesmo bergüeñoso. Pero a la fin, una aduyeta.

    A chen tamién ha de saber que o gubierno, encara que mui poco, bella cosichona ha feito, no? Ye guaire elucubrazión? pues bueno, dixemos-lo en que o gubierno no se'n ha jodiu de tot d'o Congreso.

    Con tot y con ixo, abiso ta posibles ilusos: qui creiga que se ba a fer millonario con l'aragonés ye fato. Qui creiga que ba a estar famoso por l'aragonés ye prou soniador. Y qui creiga que luitar por l'aragonés ye de buen fer, que lo dixe.

    Y sí, sí que son curiosos os topicos, y mesmo como dizes enfrontinaus... Que conste que no me fan goyo.

    Charrabís — 11-07-2006 23:53:50

  3. Quiero ser optimista como tu, Charrabís.

    Pero los feitos son:

    - No reconoximiento espreso de l'aragonés en o Estatuto.

    - No coofizialidá de l'aragonés en o Estatuto.

    - No bi ha denguna seguranza de que ixa Academia baiga a ser reconoxida por as instituzions aragonesas como organo de referenzia lingüistico en o tocante a l'aragonés.

    Ye dizir, l'aragonés ba enta debán grazias a "almas caritatibas" como tu y como yo y como el, que treballan de forma altruista por l'aragonés. E ixo lo femos con goyo, porque como belún escribiba bella begada en as "Fuellas": "No somos funzionarios, somos aragoneses".

    Yo ya solamén confío en as personas que nunca no dixaremos albandonau, y a la suya suerte, l'aragonés. Tan y mientres bi aiga muita chen que, como tu, Charrabís, treballe bien y aime as nuestras parolas, l'asperanza encara ye nuestra.

    Ixo tien a nuestra luenga, que ye de nusatros, os que la queremos. No ye de qui no la quiere y que podendo fer muitas cosas por ella, no en fa guaires, u cosa.

    Pero sin o tuyo entusiasmo, Charrabís, no iremos a garra puesto. Nos cal ixe entusiasmo a toz. Anque beluns, como ye o mío caso, lo busquemos en o corazón d'a chen que aima l'aragonés y ya no creigamos en tanta promesa falsa y bofa.

    Mistralenco — 12-07-2006 00:28:31

  4. Pos a las 0:45 d'o diya d'antes de o II Congreso m'entero d'una notizia pro negatiba que fa referenzia a l'IEA.

    Mama mía!!!

    fablapensador — 12-07-2006 00:46:30


Comentar



Recordar datos