Laburo España: 250.000 ofertas de empleo

Prenzipiamos con o CAMPÉS

Archibau en Formazión d'imbestigadors • Fecha: 04-07-2006 01:38:25

Prenzipia a imbestigazión de l'aragonés ribagorzano campés



Fernando, Rubén y yo (en primeras), como imbestigadors por parte de Nogará, emos prenzipiau ya as imbesigazions de l'aragonés ribagorzano campés. En concreto, por os dos lugars más oczidentals: Senz y Víu, y un poquet de Campo.

Yera una zona que ya fa más de dos años que Juanjo Segura y Fernando Sánchez eban imbestigau, pero agora se prene ixe treballo con más ganas y con aduya d'a DGA ta poder fer un estudio fundo d'ixa zona que, encara que cuenta con chen importán como Bienvenido Mascaray, no ha teniu un lugar destacau en os estudios filolochicos de l'aragonés.



O día domingo pasau, estiemos en Senz, Víu y Campo. Un día chenial, feba calor y sol (masiau) pero con tot y con ixo, se yera millor que en Zaragoza.
Prenzipiemos por Senz an que bisitemos bel par de casas que Fernando y Juanjo teneban ya bisitadas. Estiemos fendo grabazions y a berdat ye que un aragonés mui majo o de Senz. Dimpués en Víu, an que ya me quedé mui contento d'o bien que charraban (i hai bel par de diferenzias minimas). A chen mui maja, con conzienzia de charrar en aragonés y con ganas de continar fendo-lo y aduyar-nos en as imbestigazions. Dimpués, baixemos ta campo an que estiemos sentindo una combersa entre chen d'o lugar de tot en aragonés muito rato.



A la fin, un mui buen día que prou que abremos de repetir a sobén ta ir fendo una buena imbestigazión.
A la chen de Campo y redolada que me leigan, un saludo!!!

Tos animo a que istos días de berano faigaz as buestras incursions, ixos que podez, en a imbestigazión de l'aragonés bibo. Tos fará goyo, y dende asoziazions como Nogará u cualsiquiera, tos podrán apoyar y orientar.

Escrito por Charrabís
(9) Comentarios • (0) Referencias • Binclo pernanén


Referencias (URL para referencias)


Comentarios

  1. Se t'ha colau una errata: Veremundo Méndez yera cheso no pas de Campo. Continar asinas.

    Cheso — 04-07-2006 10:24:07

  2. Ai! mama mía, en qué estaría pensando!!!!

    Perdón, ya lo corricho!

    Charrabís — 04-07-2006 13:39:53

  3. Uaaauuu! ya beigo que tos ba ir tot ben per ixas terras, me'n alegro. Y ben majas las fotos, en os tres puestos he estau yo :-P

    Charrabís, tiens bel correo pa fer una charradeta con tu?

    fogaire — 06-07-2006 00:29:21

  4. Fogaire, m'encantaría que podeses fer una charradeta con yo!!

    Como conto que ya la tiens, la borro d'aiquí, ben?

    Charrabís — 06-07-2006 00:52:29

  5. Charrabís! Me alegro mucho de que ya hayas empezado las investigaciones. Imagino que para ti tiene que ser muy bonito hablar con la gente y estar en contacto directo con la lengua viva a la que tanto quieres. ¿La investigación en concreto para qué es? ¿Qué estáis analizando? Que sigáis muy bien! Un abrazo!

    Fer — 07-07-2006 12:58:20

  6. Cuenta si ye de bonito!

    Imachina que tu yes en una excabazión y te trobas un fósil desconoziu, una fuesa romana u mesmo una alfaya ibera... pues bueno, ixo ye o que se siente cuan puez charrar en aragonés con una persona que lo parla como luenga materna y, que amás, te diz cosas en aragonés que nunca antes han estau rechistradas u replegadas, y que confirmas o desmienten teorías y tot ixo.

    Estudiar l'aragonés sería como estar en un chazimiento como ixos. Nunca sabes bien o que te i puez trobar. Con amás, ixe componente sozial que i hai! Conoixes chen, istorias, bidas, penas y alegrías, fas pacha con unos, conoixes familias y mesmo beyes cómo güelos que charraban mui bien ban morindo... Nosé, ye una autentica pasada ta yo poder estudiar encara una luenga unica a ora y meya de casa mía. Una luenga que no s'ha estudiau encara. No te pareix?

    ¿Qué queremos fer? una descripzión total de l'aragonés que se charra por ixa zona. Amés d'aprener-lo nusatros, queremos dar-lo a conoixer y fer-ne estudios ta que, encara que baiga morindo, no se quede sin estudiar.

    Analizar... pues tot, dende bocabulario, morfosintaxis, fontética, soziolingüistica... tot.

    Ya te iré contando! por zierto, i hai por ixa zona unas eglesias romanicas que fan goyo de beyer-las!

    Charrabís — 07-07-2006 16:34:56

  7. ya me dirás si sientes "sovent" per Viu u per Senz.-

    tringoleta — 07-07-2006 19:58:17

  8. Ya'l creigo que'l sentirá. "A sobén", se diz en ixes llugars.

    fogaire — 08-07-2006 16:11:02

  9. sí, se diz a sovent. Conto que Fernando y yo el presentarem como un dato més nas V trobadas arredol de l'aragonés en 2008.

    Charrabís — 13-12-2007 23:57:41


Comentar



Recordar datos




LaInformacion.com lainformacion.com - Medio Oficial de los Premios Bitacoras 2009