Laburo España: 250.000 ofertas de empleo

L'aragonés en os zaguers tiempos

Archibau en Cheneral • Fecha: 29-05-2006 20:28:51

A tamas de tot, l'aragonés existe y millora



Faigamos un resumen de cómo han estau os zaguers meses en o tema d'a normalizazión d'a luenga aragonesa:

- Se creya a primera telebisión en aragonés y ta l'aragonés en Internet: Charrandotb.com.

- En a TVE aragonesa amaneixión capitols d'os alumnos d'o IES Buñuel de Zaragoza an que feban notizias en castellano subtituladas en aragonés. En o zertamen de cuentos "Aragón cuenta" l'aragonés ye una d'as figuras zentrals, y cuantos premios literarios fan ganadors a escritors en aragonés.

- Chuntos por l'aragonés y a creyazión d'a futura Academia son conseguindo cada begada más refirmes y amaneixen en os meyos de comunicazion a sobent.

- Se fan cartas a o director y articlos periodisticos reclamando a inclusión de l'aragonés en o estatuto.

- Se continan publicando libros y estudios sobre l'aragonés, asinas como se fan conziertos y amaneixen más grupos mosicals. Os ya existents editan nuebos CDs como Biella Nuei, Mallacán, La Orquestina del Fabirol, etc. Os weblogs en aragonés tiene más peso cada día, asinas como a luita por l'aragonés en o Rete.

- Continan fendo-se grabazions por tot o Pirineu d'a luenga aragonesa. A Bal de Chistau estió o zaguer obchetibo de l'asoziazión cultural Parola, os suyos imbestigadors, y a productora Modelika.

- En ferias, congresos, día d'o libro y chornadas, l'aragonés cuenta con presenzia.

- Se fan trobadas que contribuigan a la conzienziazión sozial como o feito por os fernandos en Panticosa con dos panticutos, un chistabín y un cheso charrando buen aragonés entre éls y a grabazion d'uno d'os zaguers ninos que parlan en l'Alto Galligo. Comarca, que de feito, ye d'as que más fa por a luenga.

- Me plegan diziendas d'a edizión d'una serie de debuixos animaus en castellano y aragonés... Se ye fendo china chana. Esperemos que a la fin en salga una alfaya.

- Cada begada l'Academia de l'aragonés ye más amán. Ya se conoixe una lista de consenso que puede estar a salbazión de l'aragonés.

Y más nobedatz que encara han de plegar... No tos ne faigatz.

Escrito por Charrabís
(4) Comentarios • (0) Referencias • Binclo pernanén


Referencias (URL para referencias)


Comentarios

  1. Jibo, pues parix que l'aragonés ba rebilcán, tot son buenas notizias. Chino chano y ta debán.

    fogaire — 30-05-2006 00:16:27

  2. Ya caleba, Charrabís, ya caleba, que belún s'enfocase en os aspeutos millors d'a nuestra lengua. Yo creigo que, güellando as condizions que arredolan l'aragonés, s'ha feito muito, y más parando cuenta que ye a soziedá zibil a que ha empentau a esfensa de l'aragonés.

    Cadaguno ye muito libre de fer un chudizio particular, u mesmo cal que cadaguno lo faiga. Seguntes a mía opinión lo que s'ha feito a lo largo de trenta añadas por l'aragonés ye una d'as obras culturals más sobresaliens que s'han feito en Aragón. Y no me cuaca ser triunfalista, porque as mancas que tien a nuestra lengua encara l'abocan en buena mida enta la disaparixión. Ye dizir, que si miramos a o esdebenidero encara lo beyemos muito fosco, pero ixo no ha de fer que nos oblidemos d'ixos aspeutos positibos, que amuestran un camín biable, ye dizir, yo creigo que o proyeuto nuestro, os alazez que pueden permitir que l'aragonés baigan enta debán, son biables. Y son biables porque, como tu muito bien fas beyer, bi ha asabelo de chen que tien ilusions por fer treballos importans. L'aragonés ye presén, y encara podemos tener ochetibamén fe en que tot no s'ha perdiu.

    Ixo sí, bi ha aspeutos negatibos, como a manca de reconoximiento ofizial sufizién, y a manca de protezión por parti d'as instituzions. Ye dizir, falla de raso una traduzión churidico-politica d'a reyalidá cultural que beicula a lengua aragonesa. No tenemos meyos de comunicazión de masas en aragonés, con chiquetas eszeuzions puntuals. No tenemos una amostranza reglada de l'aragonés como cal (anque ixa amostranza se faiga prenendo como prinzipio a boluntariedá, caldrá fer-la con meyos y en traza, dignamén).

    Creigo que a chen a qui no interese l'aragonés tien dreito a quedar a o marguin d'el, pero tamién bi ha muitisma chen que tien dreito a beyer cómo a la suya fabla materna se la trata con respeto y dignidá, como se fa por atra parti con o castellano, cosa que a yo me parixe eszelén, porque o plurilingüismo ye garantia de berdadero progreso, de riqueza y de respeto mutuo.

    Grazias a toz os que, de forma desinteresada, treballan ta que ista lengua secular nuestra no se'n baiga por as endrezeras de l'oblido, ta que as chenerazions que han de benir tiengan a oportunidá de trobar-se con iste tresoro d'a lengua aragonesa, pribilechio que nusatros sí emos teniu y tenemos. Encara. Y por muitos años.

    Chuan Chusé Bielsa
    www.juanbielsa.com

    Chuan Chusé Bielsa — 30-05-2006 00:51:03

  3. Tiens razon: a pesar de tot, l'aragones vive (rebiscolara bel dia??), y i hai un buen zarpau de personas que quieren fer cosas y las fan.

    Quiero adibir una cosa a ixa lista: as viellas parolas d'Aragon siguen chemecando y decindo "existimos" en ista pachina web.

    ixeya — 30-05-2006 14:45:13

  4. Keep up this great resource: buy hydrocodone
    buy ambien

    None — 10-04-2007 05:51:07


Comentar



Recordar datos




LaInformacion.com lainformacion.com - Medio Oficial de los Premios Bitacoras 2009