:: O chemeco d'as parolas (en aragonés) ::

O chemeco d'as parolas (en aragonés)

Atro blog en aragonés: O saputaz

Archibau en Notizias • Fecha: 07-04-2006 00:26:05

Uno más d'os que calen. Asinas sí que femos un rete...

Bueno, pues ya i hai uno más entre nusatros. Ye un nuebo blog que naixe en tiempos de tronadas y que suposa, prou que sí, un "trueno". Esperemos que no bienga d'a Caixa de Pandora!

Dimpués d'ista introduczión mitico-metafórica, imos a esmicaziar-lo como ya ye o costumbre cuan i hai uno más entre nusatros os bloggers.

Lingüisticamet ye una pasada. Lo tiene tot: fraseolochía, lexico, usos, sintaxis... Mui bien feito y se nota que con mimo y conoiximientos. Bels detalles orientals y bella cosa belsetana. Sin as rarezas (que deixa claro que no'n son, sino que son rarezas ilusorias d'una persona concreta) bascoides ixas que fan serbir beluns, y sin gota dinfluenzia castellana.
Ye dezir, d'os millors que i hai con diferenzia.

Graficament ye un poquet más... triste. Igual isto ye o que me cal a yo, que i aiga más fotos y cosas d'ixas que m'encantan. Pero seguro seguro que en i abrá luego. Que encara no i han escrito que un comentario y ya en soi paroliando yo... O detalle d'a portalada de Pedro Saputo m'ha encantau (igual como a ideya).

Sobre a suya grafía, contina con as normas d'o 87, mesmo en parolas tipo: "reflesión", asinas como feba o castellano fa bels sieglos... Bueno, bueno, que por istos entuxanos no me meto, pero bien, mui bien a imachen d'o suyo aragonés. Personalment, y encara que no soi quí ta dezir cosa, me fa muito goyo!

Temas: encara i hai poco ta charrar. Pero ya sabemos bella cosa: "Blog critico, d'opinión y reflesión sobre Aragón, l'aragonés y o mundo."
Pues muí bien, ixo nos cale, criticar y reflexionar. Y si ye tot de bez, millor, como fa o saputaz iste. Se nota que o nombre lo ha esleito acorde.

En resumen, qué contento me fa de trobar un nuebo blog tan tan bueno como iste güe en internet, que tos recuerdo que s'ha feito a presentazión en a Biblioteca d'Aragón d'a rebista Temps de Franja y d'o Espiello. En as chornadas que organiza Nogará.
Amás, maitín i abrá una charrada sobre grafía, iste tema que tanto goyo me fa (y nos) y que a beyer si se cambia ya de una begada, que ista grafía castellana simplificada ta fatos ya cansa dimpués de tantos años... buenobueno, atra begada enfaixengando-me por istos campos terreños. Ye que istas oras d'a nueit...

Resumindo atra begada: enorabuena a O saputaz, que contines con ista faina, que la has prenzipiau mui mui bien y espero que escribas muito más. Un saludo!

Escrito por Charrabís
(2) Comentarios • (0) Referencias • Binclo pernanén

Referencias (URL para referencias)

Comentarios

Entalto o saputo; ya semos un borguil de blogs.
Continan os autos deros d'a fabla ;.)
http://actualidad.terra.es/provincias/zaragoza/art...
guara — 08-04-2006 11:50:46
Chornadas de Nogara en prensa:
http://www.diariodelaltoaragon.es/noticias/detalle...
guara — 09-04-2006 18:19:42