:: O chemeco d'as parolas (en aragonés) ::

O chemeco d'as parolas (en aragonés)

Presentazión de Charrando Telebisión

Archibau en Notizias • Fecha: 06-04-2006 00:00:49

Un poquet de protagonismo ta l'aragonés en Internet

foto

Güe, como deziban os cartels, s'ha feito a presentazión de Charrando TB en o marco d'as XIII Chornadas d'as Luengas d'Aragón en a Biblioteca d'Aragón.

Ya sabetz que en toda ista semana se son fendo charradas, ponenzias, presentazions y debatz sobre istas luengas. Bueno, pues güe nos tocaba a os de Charrando TB!!

Más de bint y pico de personas han quiesto sentir a nuestra istoria. Cómo prenzipió, os nuestros problemas d'alox, de diners, de chent... O futuro...
Emos charrau Miguel y yo, pero tamién i yeran Dani y Paco (a l'atro Dani l'emos trobau a faltar...).

A charrada ha prenzipiau mal, mal: l'ordenador d'a biblioteca no funzionaba que con Windows 98 y i eba problemas con a nuestra presentazión y os bideos y no s'ha puesto fer como tenebanos pensau.
Alabez, a opzión B: conectar-se directament a Internet y ir fendo a charrada dende a nuestra pachina. B
ueno, pues en ixos intes, o serbidor yera fendo reformas y no marchaba!!!

A la fin, la emos feito sin cosa, no más con l'apoyo d'a pachina y sin bideos. Dimpués, en o turno de preguntas, ya s'ha apañau o serbidor y emos puesto fer dos bideos: o estreno d'un documental d'a feria Educa y Empezar, y ta rematar o espot de chuntos. Ambos feitos por Charrando TB.

Total, que si s'ha prenzipiau mal, s'ha rematau mui bien. I eba chent que s'ha animau a dentrar en o grupo y a treballar en a telebisión y atros a apoyar y aduyar. Tos recuerdo que Charrando TB ye una plataforma ta totz os que queratz. Si queretz fer cortos, bideos, entrebistas, amostrar o buestro lugar u o puesto de treballo, grabar o buestro treballo, fer a rezeta de cozina que más tos faiga goyo en aragonés... etc... lo podetz nimbiar y se puyará enta a web.

Esperemos que prochectos como iste continen enta debant...

Escrito por Charrabís
(7) Comentarios • (0) Referencias • Binclo pernanén

Referencias (URL para referencias)

Comentarios

Por zierto, como se prometió (Dani, yes increyible si lo has feito tú, qué rapido!) ya ye en Charrando Tb o zaguer bideo que s'ha presentau güe en as Chornadas de Nogará.

Feria EDUCA
Entre o 15 y 19 de marzo se fizo a Feria d'Educazión, Formazión y emplego an que l'aragonés i tenió presenzia con a reyalizazión de diferens autibidaz.

Durazión: 5 min 17 seg

Ale, totz a beyer-lo!
Charrabís — 06-04-2006 00:21:45
Solamén puedo dizir: ESZELÉN ideya la de creyar Charrando tb. Anque siga modestamén, cal empentar l'ambista d'a produzión audiobisual en aragonés, sin asperar a iniziatibas instituzionals que sisquiá bel día naxcan. En o mundo de güei o fenomeno audiobisual ye tan importán, u más, que a mesma literatura y o suyo prestichio, ta prebar de normalizar una lengua.

En Andorra ya dende fa añadas tenemos a suerte de contar con emisions de telebisión por meyo d'a telebisión local, por zierto con muito buena azeutazión y acullita por parti d'a chen. O merito ye d'a Colla d'os Barfulaires, gran merito sin de duda, o suyo treballo ha estau gran y de calidá.

Y no puedo rematar sin tornar a felizitar-te, Charrabís, por a tuya sobrebuena faina. Yes creyando un autentico periodismo dichital en aragonés. Apreziamos lo tuyo treballo de calidá y a tuya rasmia, que son un exemplo ta toz.
Chuan Chusé Bielsa — 06-04-2006 01:22:03
Ola Chuan Chusé, pues anda que no yes majo tú, que si me dasen diners cada begada que m'animas...

O tema de Charrando TB te recuerdo que ye una PLATAFORMA ta totz. Ye dezir, que si fas un bideo de 5 minutos d'o tuyo lugar, d'o tuyo treballo, d'as tuyas bacazions u d'o que sía, nusatros lo i puyamos y lo beye tot o mundo ( con una mica de cudiau en o parlache). Nomás caldría reunir dos cosas:

- En aragonés (o que sía en atras luengas ha d'ir transcrito).
- Apolítico. Charrando Tb en primeras ye como iste blog: APOLITICO.

Y una parla cudiada y esmeradeta, ok? Ale, a beyer si fas bella coseta tú y qui quiera, porfa... que nusatros solos no podemos fer guaire, nos cal más chent...
Charrabís — 07-04-2006 00:01:11
Lo primero disculparme por no poder hablar en aragonés (algún día aprenderé, lo prometo, pero ahora me falta tiempo). Reiterar lo que le dije a Montañés, que podeís contar conmigo para lo que haga falta. Saludos de parte de Fran.
(Si alguien traduce esto al aragonés y lo cuelga borrando mi mensaje estaría bien siempre que se incluya mi nombre y url)
de Lioncourt (Tony) — 07-04-2006 11:27:03
Muitas grazias por l'aduya que nos ofreixes! Si ya has charrau con Montañés, alabez ya abretz quedau en bella cosa.

Puetz escribir en castellano en iste blog sin garra problema. Nomás yo me tiengo auto impuesto d'escribir en aragonés. A resta puede fer o que quiera.

Con tot y con ixo, te traduzco o texto aquí debaixo:

"En primeras, disculpar-me por no poder parlar en aragonés (bel día lo aprenderé, lo prometo, pero agora no me baga). Reiterar o que le dizié a Montañés, que podez contar con yo ta o que calga. Saludos de parte de Fran."

Como beyes, ye de buen fer, t'animo a que lo aprendas!
Charrabís — 07-04-2006 13:42:42
M´i trobau ista pachina de sopeton rechirando bellas cosetas por asti, a berdad ye que m´a cuacau e muito.
O que me cuacaria seper, ye en do se fa ixo d´a tv en aragones, ta bier si podemos bierlo asti por Jaca.
Anque soi por asti no trobo naide con qui charrar l´aragones y a iste paso me se ba supligar o poco que remero.
Ya en he de metre-ne parolas en castellano por que me s´an supligau as aragonesas de no charrar-lo dende chicoton.
dica mas bier y a plantar zereños
Fernando Ara Bordanaba — 21-06-2006 22:51:13
M´i trafucau y he metiu metre-ne, en cuenta de meter-ne.
Ya me ferez a fabor de perdonarme
Fernando Ara Bordanaba — 21-06-2006 22:56:50