:: O chemeco d'as parolas (en aragonés) ::

O chemeco d'as parolas (en aragonés)

Entrebista en Aragón Radio

Archibau en Notizias • Fecha: 03-04-2006 10:45:59

Güe, entrebista a Fernando Sánchez.

foto

Güe, a las 10:45 d'o maitín, se fará una entrebista en Aragón Radio a Fernando Sánchez. Secretario de Chuntos por l'aragonés, secretario de l'Asoziazión Cultural Nogará, y uno d'os millors imbestigadors que agora tiene l'aragonés.

Se i charrará d'as 13nas Chornadas sobre as luengas d'Aragón que fa Nogará cada año y d'as charradas que i abrá ista begada.

Tos recuerdo que en Zaragoza a frecuenzia ye 94.9, en Uesca ye a 90.0 y en Teruel a 105.2.

En a foto podetz beyer a Fernando charrando con Hilario en Agüero ayer. Fazió un mui buen día y podiemos paroliar con cuasi toda a chent que pensábanos. Tos animo a puyar os cabos de semana a os lugars y fer parla con a chent, de bez que s'imbestiga un poco más ista pobreta luenga.

Escrito por Charrabís
(4) Comentarios • (0) Referencias • Binclo pernanén

Referencias (URL para referencias)

Comentarios

Ya ha rematau a entrebista. S'ha feito prou bien, o entrebistador mui simpatico y pareixeba que mesmo interesau en l'aragonés, y Fernando igualment de bien.

Ha feito un resumen d'a situazión actual de l'aragonés, d'o que son as chornadas y d'as charradas que i hai, y ha comentau bels minutos a istoria de l'aragonés, dende a Edat Media an que yera ofizial y luenga culta dica o s. XV que deixó de estar-ne, y en l'actualidat que ya no se parla que en as bals y puestos más altos, an que sufre un grau prozeso de castellanizazión.

Tamién ha charrau de Chuntos por l'aragonés, de que cal fer a Lei de Luengas, y que o gobierno no le fa ni caso a l'aragonés.
A canta introductoria ha estau de Prau ya d'a fin de Ixo Rai.

A entrebista ye grabada, asinas que si tos interesa se puede mirar de pasar-tos-la.
Charrabís — 03-04-2006 11:17:29
Pencha-la aquí. Igual como fa Guineu.
fablapensador — 03-04-2006 15:08:36
Yo ixo no sé fer-lo ni si bitacoras permite de fer ixas cosas...
Charrabís — 03-04-2006 21:50:19
Ubre-te un blog de soniu en http://www.castpost.com/ (con el "sign up"). Podrás penchar-ie tot el que quieras y podrás fer-ne els html ixes que poso en el miyo blog. Ta tallar y fer mezclas de soniu antis de penchar audios en el castpost, baixa-te l'audacity d'aquí: http://descargas.vnunet.es/descargas/mp3/audacity/... Dimpués, ta guardar como mp3, te caldrá un fichero nosequé.dll (el trobarás gratis en el rete). Mira de fer-lo, Charrabís, que asinas els que no estam per Zaragolandia podrem escuitar ixas cosetas.

Felizitazions ta Fernando Sánchez p'el suyo treballo.
Guineu — 03-04-2006 23:43:39