:: O chemeco d'as parolas (en aragonés) ::

O chemeco d'as parolas (en aragonés)

Zierzo en o parque

Archibau en Notizias • Fecha: 07-03-2006 13:39:03

Un maitín de pelicula

parque

O día domingo 5 de marzo se fazió como siempre en o Parque d'o Tío Chorche a zincomarzada. Ista begada, una mica diferent a la resta d'años.

Si bien tot o maitín feba aire y fredo, a las 2 d'a tarde prenzipió a fer-ne más, y arbols, puestos, ballas y de tot prenzión a espaldar-se. As brancas d'os arbols tremolaban tanto que plegaban a crebar-se y cayer en tierra.
Por desgrazia, se dión bels casos de contusions y golpes y mesmo dimpués nos enteremos que i eba personas en "estau grau".

A polizía y bombers prenzipión a desaloxar o parque y os puestos de bellas asoziazions (como o de Nogará en a foto d'alto) tenión que desfer tot o feito y replegar as cosas antes con antes ta salir-ne a escape.

parque 2

Tenié a onor de conoixer un nino de 7 años que charraba en aragonés estandard, y me fazió muitismo goyo. Sé que en i hai atros que tamién lo charran, pero iste Chusé lo feba mui bien, y amás le cuacaba de leyer os libros en aragonés. Un saludo, nino!

A la fin, tot remató bien ta nusatros y podiemos rematar o día "sanos y salvos", ixo sí, chelaus de tot!
Como digo, un maitín de pelicula...

Escrito por Charrabís
(0) Comentarios • (0) Referencias • Binclo pernanén