:: O chemeco d'as parolas (en aragonés) ::

O chemeco d'as parolas (en aragonés)

Nuebo blog en aragonés: O capazo

Archibau en Notizias • Fecha: 06-03-2006 23:55:26

Nuebas ideyas y soluzions en tiempos de cambio.

Capazo

Ha naxiu un nuebo blog en istos tiempos de baixas y muertes en a blogosfera en aragonés. O suyo títol ye "O capazo", y lo trobo como ixe airaz que fa mober-se as boiras y deixa beyer o sol.

Encara no ha publicau guaires notizias, pero ya lo ha deixau tot bien claro: charra de l'actualidat, d'as posibilidatz de futuro de l'aragonés, d'o mobimiento, d'os problemas que i hai...

Lingüisticament ye una alfaya de tot. Ye a primera begada que se prenzipia a fer una reformeta más flexible d'as normas graficas presas fa 30 años a partir d'a grafía castellana sin mirar de fer una grafía propia basada en a tradizión mediebal. En resumen, ye como una ampliazión d'a norma, seguindo os acuerdos, pero millorando-los ta fer una grafía más diastratica y diacronica.
Os cambios son: restituzión d'a -t en toz os casos que cal, emplego de ny, emplego de ix, conserbazión d'os grupos cultos, plurals en -tz (pronunziaus z) y en -ts (pronunziaus s), ye fazil. Y poco más. En reyalidat una ampliazión que caleba y que muitas personas y sectors pediban dende fa tiempos.

A suya luenga, como a grafía, ye atro d'os aziertos: Fresca y moderna, aglutinadera, común, referent d'un estandar adecuau y culto... En fin, un estilo y construczions que fan goyo de leyer. Sisquiera s'en fese más asinas, tanto de blogs como d'escritos.

A la fin, un blog de calidat con una ambista critica, d'opinion, en una luenga cudiada, nobedosa, más plural, más actual, conszient d'as suyas posibilidatz, que ye o que cal. y, estoi que, azertada en a ortografía, bebendo d'os acuerdos y d'as normas bichents, pero fendo bella ampliazión que ya caleba fer.

O capazo

Por zierto, en zagueras soi una miquinina aqueferau en cheneral, pero no por ixo deixaré morir o blog. Ya miraré d'ir actualizando-lo más a sobent.

Escrito por Charrabís
(0) Comentarios • (0) Referencias • Binclo pernanén