:: O chemeco d'as parolas (en aragonés) ::

O chemeco d'as parolas (en aragonés)

Nuebo blog y nuebo programa de radio en aragonés: Sputnik

Archibau en Notizias • Fecha: 26-01-2006 14:51:35

O boom de l'aragonés en internet?!

Sputnik

Si ayer (ista nueit) escribié sobre l'actualidat d'a blogosfera en aragonés con a incorporazión de dos nuebos proyectos, ye a saber, Guara y Lizaina, iste zaguero encara parix que ye en prebas; güe he de fer-tos contentos con un nuebo blog en aragonés que amás suposa una nobedat en l'ambista d'as funzions y ferramientas que nos ufren istos sistemas de comunicazión.

Sputnik se fa como un blog que faiga d'extensión d'o nuebo programa de radio que prenzipia iste sabado a las 8:00 d'a tarde en a Radio la Granja (102.1 FM). Ye una radio de Zaragoza, asinas que o programa se podrá sentir en dita ziudat en un determinau radio (no sé si l'amplaria d'o siñal será guaire gran).
A notizia tamién ye que iste programa estará apoyau dende O Rete por o blog homonimo: Sputnik.
Ye un blog de colos berdiscas, con un aragonés estandarizado mui actual que mesmo triga ampres d'atras luengas chermanas. Tot isto con una tendenzia a la nobedat mesmo en a grafía, que si bien bebe d'os acuerdos, dixa transluzir nuebas tendenzias d'a frescor d'a chobentut. Ye una luenga rebitalizada con ideyas nuebas y un proyecto ilusionán, un programa radiofonico en aragonés que iste sabado prenzipiará o suyo biache.

O blog tamién nos cuenta as opinions personals de l'autor: politica, cultura, reflexions... Ye un blog ecleptico d'un programa ecleptico: una nobedat que prou que nos fará goyo a toz.

Espero que as cosas no s'estén aquí y que toda ixa chen que siempre ha quiesto fer un blog ta contar as suyas experienzias en aragonés mire de prenzipiar, que puede que salga bien u puede que salga mal, pero o importán ye dixar de chemecar y treballar, fer proyectos, ilusionar.

Escrito por Charrabís
(1) Comentarios • (0) Referencias • Binclo pernanén

Referencias (URL para referencias)

Comentarios

Muitas grazias per as tuyas parolas, alientan a parar Sputnik con más ganas.

Dica atra!
Sputnik — 28-01-2006 18:42:40