:: O chemeco d'as parolas (en aragonés) ::

O chemeco d'as parolas (en aragonés)

Blog de zienzia

Archibau en Notizias • Fecha: 06-01-2006 02:42:09

Mui interesán: blog de zienzia.

Ya sé que no ye o normal, y que todas as notizias que cuento son en aragonés y de l'aragonés. Pero ista begada he de charrar-tos d'un blog en castellano que a berdat, m'encanta.

Ye NovaCiencia.com, y trata de l'abanguarda d'os abanzes zientificos. Ye mui bien feito y os articlos fan muita onra.
Ta cuán un blog como iste en aragonés? encara que siga una traduczión... Muitas cosas a fer en l'aragonés y poca chen que quiera u pueda.

Espero que os quiestos Reis Magos d'Orien tos aigan trayiu muitos regalez (estoi que toz abrez estau buena chen) y que encara conserbez a infantil sonrisa d'os ninos.

Escrito por Charrabís
(1) Comentarios • (0) Referencias • Binclo pernanén

Referencias (URL para referencias)

Comentarios

Tiens razón, Charrabís, agora o que cal ye emplegar l'aragonés ta TOT, asinas ye como una lengua se normaliza, prebando a fablar en ella de TOT, dengún tema ha de quedar difuera de l'ambito de l'aragonés, emos de prebar d'autuar "como" si l'aragonés fuese una fabla "normal", u a lo menos emos de meter as nuestras fitas bien luen. Toz sapemos que as nuestras fuerzas son minguatas, pero no por ixo ya emos d'achiquir-nos y pensar en chiquet.

Cal fer pachinas de zienzia, astrolochía, literatura, arte... en aragonés. Difízil ye, porque poqueta chen somos, pero a lo menos a ideya astí queda, y en cualsiquier caso tamién bi ha chen que sape aragonés espezializata en os temas debanditos, y en muitos atros, y más d'o que nos pensamos.

Pero en fin, tamién en l'ambito "no birtual" bi ha mancas grieus. Ta yo, a que me parixe más incomprensible ye a manca d'una rebista literaria en aragonés. No puedo capir que no en bi aiga a lo menos una adedicata en esclusiba a la publicazión de triballos poeticos y narratibos.
Yo creigo que serba menester, aparti de "Fuellas", "Espiello", "Luenga & Fablas"... una publicazión adedicata en esclusiba a la literatura en aragonés, una publicazión no prezisamén ta eruditos, sino ta toda la chen a la que li cuaca l'aragonés y a creyazión literaria.

En asturiano bi eba, y no sé si contina publicando-se, una rebista literaria clamata "Lliteratura", senzillamén estraordinaria, d'una calidá sobrebuena.

Resumindo, que cal dibersificar os temas que se tratan con a nuestra fabla, asinas se normalizan de berdá as lenguas, como ya diziba denantes.

Por zierto, a yo me cuaca, como simple neofito, o tema de l'astronomía (planetas, sistemas solars, estrelas, foratos negros, big bang, polbo interestelar, planetas estrasolars...) Me cuacaría asabelo que bel esperto que sapese aragonés m'ilustrase ¡en aragonés! sobre istos temas intresantismos. Ye un exemplo, si lo me premitiz.

Esprisions.
Chuan Chusé Bielsa — 21-01-2006 00:38:58