:: O chemeco d'as parolas (en aragonés) ::

O chemeco d'as parolas (en aragonés)

Grabazions en Pandicosa I

Archibau en Notizias • Fecha: 03-12-2005 00:03:25

Fernando Romanos cuenta bellas cosas d'as grabazions

- En un ratet, Fernando Romanos nos cuenta as suyas impresions d'as grabazions y bels comentarios lingüisticos:

"L'aragonés de Pandicosa ye más bibo que no parix, todas as personas de 35 t'alto lo charran de forma cutiana, y bien conserbato, con cuasi toz os rasgos, nomás as formas de plurals d'os berbos en Z y en bels casos os plurals empezipian a bandunguiar-se.

Se conserban toz os rasgos que deziban Nagore, pero muitos más que no dize y que lo azercan más enta l'orién y no pas enta ozidén, como por exemplo un emplego prou sistematico de l'articlo "es", y construzions, perifrasis y lesico identico a l'emplegato en Sobrarbe, os partizipios en ATO son tan enradigatos que cuan castellanizan dizen "he subito y he bajato"

- Considera dende l'ambista soziolingüistica que:

A conzenzia lingüistica ye buena, charran de panticuto, d'aragonés y de "fabla" y tienen conzenzia de charrar algo diferén d'o castellano y les faría goyo que no se perdese.

- As soluzions y as posibilidaz de futuro que se podrían fer en ixa redolada son, ta él:

"Un taller partizipatibo les faria rebiscolar l'aragonés que encara charran, pero por fabor, no pas un curso... que no cal ir a amostrar-les cosa, que caldría aprender d'els."
...

He d'agradixer a Fernando Romanos o suyo tiempo y espero que tos aigan feito goyo de leyer, encara que no siga guaire, as suyas impresions.

Maitín estoi que publicaré a entrebista con Fernando Blas con as cosas que se fazión cada día, bels detalles d'a grabazión y más curiosidaz lingüisticas y soziolochicas..

Una cosa más. Mui, mui, mui majo ixe mapa que comenta Alto Galligo en a notizia anterior. Faría de majo en todas as escuelas, institutos, y instituzions d'a Comarca...
Felizidaz a l'Alto Galligo y a ixa chen que fa tanto por a luenga.

Escrito por Charrabís
(0) Comentarios • (0) Referencias • Binclo pernanén