:: O chemeco d'as parolas (en aragonés) ::

O chemeco d'as parolas (en aragonés)

Comunidaz aragonesas

Archibau en Opinions • Fecha: 24-11-2005 13:23:48

"Aragón, a tierra que nos une"

Benezuela

Como ya sabez i hai un rete de zentros d'aragoneses por España y por o mundo que representan a Aragón por an que ban. En i hai 12 espardius por Archentina, Olanda, Belchica, Andorra, Cuba, u Franzia; y 49 en España.

Gosan tener una rondalla y fan actibidaz de todo tipo (dende yoga a biaches organizaus).

L'aragonés no gosa amanixer en as suyas pachinas webs ni publicazions, pero encara podemos trobar exemplos de comunidaz que sí que reflexan ista luenga propia (y no nomás cantar "s'ha feito de nueit"). De feito, o Zentro Aragonés de Cordoba (Archentina) han refirmau o manifiesto de Chuntos por l'aragonés.

Uno d'ixos zentros que fan exemplo ye a Casa d'Aragón en Sebilla. En a suya pachina podrez beyer a suya rebista: A cadiera y beyer cómo en a zaguer fuella d'as zaguers rebistas nos cuentan bels refrans y frases en aragonés.
- Farta-te aora que'n beis
- Más negra ye a fambre con sol que a zena con cols
- O clarete fa cantar y a garnacha barafundiar
...
Dende o 2003 no s'ha feito más ixa rebista (u no la han dichitalizau), asinas que ya plego tarde.

En o Zentro aragonés de Cantabria tamién podrez trobar-ie refrans y parolas (ista begada sin conzenzia de luenga).

No m'ha bagau de leyer todas as pachinas web, pero estoi que en abrá más con cosas d'aragonés. Animo a qui tienga tiempo y ganas (tanto asoziazions como indibiduals) a que contacten con istos zentros y miren de fer buenas relazions.
Por exemplo, en Bruselas, a Casa d'Asturias i farán unas chornadas d'asturiano.

Escrito por Charrabís
(1) Comentarios • (0) Referencias • Binclo pernanén

Referencias (URL para referencias)

Comentarios

Sin querir malmeter, ñai una Casa d'Aragón que me fica de mala birchen: els "Amigos de Aragón" de Bruselas. Ben seguro que las chents que ie están de sozios son buena chent, pero tienen de presidenta a Carmen Bayod, que ba escribir isto en el boletín de l'asoziazión y que ba combidar al suyo correlichionario facaoer Raúl Vallés ta que escribise isto en el boletín 50. Que Carmen seiga la filla de Roberto G. Bayod, proome de la FACAO ya fallexiu y que da nome a'ls premios ta literatura en "aragonés oriental" d'ixa federazión, no le da dreito a manipular el catalán d'Aragón tan maltrazerament "en el nome d'el pai".
Guineu — 24-11-2005 21:32:00