:: O chemeco d'as parolas (en aragonés) ::

O chemeco d'as parolas (en aragonés)

Lei de Luengas

Archibau en Notizias • Fecha: 16-10-2005 16:51:10

Nuebas y buenas notizias

Si i hai una cosa mala de dormir tarde, ye que te debantas tarde y t'enteras d'as notizias una begada que ya las conoxen toz.

Isto m'ha pasau con o Periodico d'Aragón, que lo he leyiu más tarde que a resta d'a chen.

I amanixen dos notizias que plenan toda a pachina que son d'importanzia ta toz os aragoneses (charren a luenga que charren y sigan d'a ideolochía que sían) porque reconoxen dreitos que caleba reconoxer dende feba un cuarto de sieglo.

A primer notizia diz: Toz os colechios d'a Francha deberán ufrir clases en catalán.
Comento ixa notizia:
Será obligatorio que os colechios que son en zonas an que se charran aragonés u catalán ufran a posibilidat d'aprender ixas luengas a los pais. Pero éls serán qui dezidan si os suyos fillos las fan u no. Ixo ye o "prenzipio de boluntaridat". D'ista traza se cumplen dos obchetibos que me parixen bien: os pais y ninos que quieran tienen o dreito a estudiar as luengas; y qui no quiera, tien a libertat ta no fer-lo.
Con ista soluzión, toz d'aduerdo (fueras d'os radicals d'ambas partes).

Unatra custión ye a ofizialidat, an que tamién s'aplica a famosa sentenzia "Ni pa ti ni pa mi": a unica luenga ofizial d'Aragón ye o castellano, mientres que l'aragonés y o catalán son reconoxidas como propias. Bueno, ta qui les feba miedo ixo d'a coofizialidat, ya son contentos porque istas luengas no'n son. Ta qui como yo, nomás queremos que se treballen y estudien, que se las apoye y se i faigan os filologos... pues igual me tiene. Talmente siga una paret en bel caso, pero con buena boluntat de toz, a denominazión rai.

A segunda notizia diz: A norma sobre as luengas amanixerá con cuasi un cuarto de sieglo de retraso.
Isto ye pura berdat. Aquí en Aragón ya se feba tarde con o reconoximiento d'os dreitos lingüisticos d'os ziudadans. Asinas lo han dito multitut d'organizazions que podez leyer en Charrando.com (Lechislazión).
Resumo: Un conchunto de despropositos politicos dende fa tiempos ha puesto fer que l'aragonés siga una d'as luengas más minoritarias d'Europa.

A la fin, toz emos de felizitar-nos por as nuebas notizias. Que puede estar que siga una lei curta, que belunos quereban más, pero siñors: isto será una reyalidat con que cal treballar. Os lechisladors nos darán ferramientas, nusatros agora tenemos que saber fer-las serbir con libertat, con rispeto enta a resta de ziudadans, y con cabeza.

Escrito por Charrabís
(2) Comentarios • (0) Referencias • Binclo pernanén

Referencias (URL para referencias)

Comentarios

No fa guaire buena ulor ixa Lai. Ta el miyo llugar, mos dixa igual; y "igual" quier dir que continarem con una llengua d'escuela (bellas oretas, tampoco mos pasem) y de casa-bar-botiga, que ta las cosas serias ya s'ha creyau el castillán. Ta l'aragonés é bueno que se puga aprender en toz els llugars, pero no sirbe ta cosa una llengua trancada adintro d'els colechios. Bella buelta me pienso que dende la DGA se mos ne fan la mofla.
Guineu — 17-10-2005 15:54:37
soi con guineu. Aguardar 2o añadas ta isto... sin coofizialidá una luenga no esiste. No la podremos fer serbir ta escritos ofizials, ni ye obligatoria ta l'altoaragon (o castellano sí, mira que majo).
Ta ro catalan se lis picha en a boca, pos o unico que fan ye fer ofizial lo (poco) que se fa agora.
Si, claro millor isto que no cosa... pos no sé, de berdá, no sé...con o que salga nos quedamos lo menos atros 25 años.
mallatas — 17-10-2005 18:32:09