:: O chemeco d'as parolas (en aragonés) ::

O chemeco d'as parolas (en aragonés)

Fiestas

Archibau en Notizias • Fecha: 15-10-2005 14:22:56

Una d'as millors nueiz de Pilars

En a nueit d'ayere, un aquelarre de bruxas, en as boiras, salión d'acuerdo y fazión que nomás plebese de tardes, asinas que de nueiz se podión fer toz os conziertos y actibidaz que yeran paradas.

Umor

En l'actuazión d'umor d'a plaza San Bruno (Nasú, Muac Muac y Mac-Clown), o castellano d'aragón teneba a suya importanzia umoristica con uno d'os personaches qui plenaba o suyo discurso con parolas tipicas d'os repuis lexicos de l'aragonés. M'entiboqué en primeras porque en a presentazión d'ixa colla dizión que se faría en "fabla", pero dimpués ya beyé que ta éls, a parola "fabla" ye sinonimo de castellano d'aragón.

Dimpués d'ixa plaza nos ne fuemos a unatra: a plaza de San Felipe, an que sí que se fazió tot en aragonés (fueras d'as introduczions d'as cantas), grazias a la Orquestina del Fabirol. Feba goyo de beyer-ie tanta chen sentindo y bailando cantas de ninos y no tan ninos en aragonés. A plaza yera plena mesmo i eba chen forana (estoi que erasmus) que se'n regalón con todas as cantas.
Orquestina, ixo sí que ye fer faina por l'aragonés.

Una chicota critica: m'abría cuacau sentir a canta d'o Pirata montañés... Bueno, ta atra begada.

Ronda

Ta rematar, una ronda por as carreras d'a zona.

En resumen, una nueit chenial! Ya que se'n fesen más entre l'año!

Escrito por Charrabís
(0) Comentarios • (0) Referencias • Binclo pernanén