:: O chemeco d'as parolas (en aragonés) ::

O chemeco d'as parolas (en aragonés)

Chen de campo VIII

Archibau en Cheneral • Fecha: 04-09-2005 17:17:24

Misa

Güe, en misa, no i eba dengún zagal. Nomás os ninos, que sus pais feban ir obligaus, y bel choben de más de 30 años. A resta yéranos biellos.

M'acuerdo que d'antes más, a ilesia yera plena de chen. No se i culliba! Tot yeran ninos correndo por o coro, mesaches que feban de monaguillos u charraban en os bancos, mesachas que (con os millors traxes) lebaban a banasta d'as donazions... Agora ya nomás os biellos. Y un cura que fa sermons ta él.

No sé qué ha pasau y en qué poco tiempo. Han dixau de creyen en Dios os chobens, han dixau de pensar-ie? u nomás ye una moda como ixa de repetir mil begadas "va a ser que no"??
A resta de mullers tamién en han parau cuenta, y dizen que ya no se puede fer cosa, que en bels años no caldrá que bienga dengún cura ta o lugar porque no i abrá dengún que pueda sentir os suyos sermons.

Escrito por Charrabís
(2) Comentarios • (0) Referencias • Binclo pernanén

Referencias (URL para referencias)

Comentarios

La miya opinión, siñora, é que el zaguer Papa ba fer molto mal a la Llesia; y el digo, no me'l pille a mal, con tot el respeto ta las creyenzias de cadagún. Iste Papa d'ora, de qui sin dembargo dizen que é encá més conserbador que l'altro, a lo menos se mantién més prudente. Pero el mundo chira y... no el beigo claro que las nuebas chenerazions faigan guaire caso a la Llesia si no cambea el suyo discurso.
Guineu — 05-09-2005 13:20:52
Pos puede estar que bustet tienga razón. Puede estar que una d'as causas sigan os Papas, pero yo lo beigo (que no sé) como que os chobens istos no fan caso d'ixas cosas, ni d'os Papas ni d'as suyas ideolochías.

Beyen más a Ilesia como una cosa d'os biellos. L'atro día, en a plaza, le dizió tia Milagros a un fillo d'ella que por qué no baxaba t'a misa, y l'atro le respondió que ixo ta os lolos, que él, os domingos de maitins, dormiba as oras que eba perdiu o sabado.

Y a zaguera cosa que beigo, a chobenalla d'o lugar s'estima más pensar en atras cosas que no en a relichión. Asinas lo beigo yo, no sé os chobens qué en dirán, pero de seguras que ni me responden...
Siñora Charrabís — 05-09-2005 23:48:25