:: O chemeco d'as parolas (en aragonés) ::

O chemeco d'as parolas (en aragonés)

Ninonaninón

Archibau en Notizias • Fecha: 27-07-2005 23:52:41

Fendo escuela

Foto d'a portada

"Fer escuela", ixo que feban profesors y ninos en Plan, un lugar de la bal de Chistau, ye a traduzión literal d'o que fan istos mosicaires en o suyo zaguer treballo "Ninonaninón". Güe m'he mercau o suyo disco por 17 euros (sé que foi tarde, perdón) y no puedo dixar de sentir-lo. Estoi que tornaré a gastar-me-ne 17 y atros 17 ta regalar-lo por astí, porque fa falta que a chen lo sientan.

Ye una marabilla, dende l'ambista filolochica y tamién como metodo d'amostranza ta ninos y grans. Muitos de nusatros tenébanos oblidadas cosas tan importans como as lizións que se i fan.

Cal reconoxer que La Orquestina del Fabirol son buenos y fan buena mosica. Dende aquí tos digo que m'aprenderé as buestras cantas y que les ne amostraré a tantos ninos como pueda.

Grazias por tot.

Escrito por Charrabís
(3) Comentarios • (0) Referencias • Binclo pernanén

Referencias (URL para referencias)

Comentarios

Grazias, en nombre de toz es compañers de La orquestina, per o tuyo comentario. Nos femos contentos que o disco faya goi per astí, ta ixo ye feto.
Dimpués de cuasi bente añadas fendo mosica y siete discos, cal continar luitando como lo primer diya. No femos que treballar en a endrezera que nos parixe enzertada y que, amás, nos agana; igual tiene que sía en custions de luenga como de mosica y cultura aragonesa en cheneral.
Pero tos adelanto que a fayena de Ninonaninón no remata en o disco. Con o curso escolar s'editará una programazión didautica (de cadaguna de as 15 piezas de o disco esdebiene una unidat) ta que mayestros de primaria puedan emplegar o disco como traste pedagoxico. Y o Dpto. d'Educazión ha preso el compromís de nimbiar-la ta toz es zentros escolars (!)
Tamién tos adelanto que a nuestra web (www.fabirol.com) ye cuasi ya presta y, anque ha enchegau no más que en español, per a prisa que caleba, mui luego amanixerá en aragonés y inglés.
Roberto Serrano — 29-07-2005 18:11:43
Muitas grazias a toz busatros que nos alegraz a bida con mosica en aragonés, y por iste zaguer disco que no puedo dixar de sentir. Ya me'n sé "Can trabeser", encara que a pieza que m'estimo más ye "Un pirata montañés".

Tos felizito por ixe logro con o Dpto. d'Educazión, aspero que ixos materials que farez de cada pieza tamién los podamos leyer chen que no femos primaria, que de seguras que se podrán fer serbir en atros puestos.
Ya güe m'han comentau que ye un treballo (Ninonaninón) que ta l'amostranza puede fer onra.

A buestra pachina la meteré en os binclos cuan siga en aragonés tamién.

Que podaz ilusionar a toz os ninos d'aragón como m'ez ilusionau a yo con ixos ritmos y ixas letras.
Suerte, ya sabez que podez contar con yo y con istos chemecos que escribo en internet en una luenga que, grazias a chen como busatros, luego dixará de chemecar y prenzipiará a redir y soniar.

Un saludo y que continez muitos años más.
Chorche Martín — 29-07-2005 23:19:28
Que m'emoziono co!
Fablapensador — 30-07-2005 11:22:33