:: O chemeco d'as parolas (en aragonés) ::

O chemeco d'as parolas (en aragonés)

Afogau III

Archibau en Cheneral • Fecha: 09-07-2005 01:05:28

Tiengo dreitos?

A l'atro'l día, un nino me fotió un pilotaz en a cara! "Pero nino, tiene más cudiau! que ixo fa mal!" Le dizié, y bueno... a l'inte ya teneba a la suya abuela debán de yo y carrañando-me: "que si no tiengo dreitos ta gritar, que si no m'eba dau denguna piloteta, blablabla..., os galbans a treballar como a resta, blablabla."

Ixo te fa pensar (dimpués de controlar o tuyo instinto asesino d'abuelas megas) en cosas tan importans como os dreitos d'os pobres, pero d'os pobres d'aquí, no pas d'Africa, d'os pobres d'o tuyo bico y d'a tuya carrera.
Me pregunto:
- Tiengo dreito a bibir? No ta muita chen. I hai chen que matarían a los pobres, tos lo digo yo. Y i hai paises que u no te dixan dentrar-ie u si puez dentrar-ie, te fan a bida imposible.
- Tiengo dreito a adoptar? Prou que no, soi pobre. Pobre nino, no?
- Tiengo dreito a soniar? Sí.
- Tiengo dreito a estar respetau? No, no ixo, si me fan bella cosa, a chen no me defienden. Ni a polizia, muitas begadas. M'insultan, me gritan, me dizen de tot, me carrañan, se me miran mal, no me fan caso en as botigas, no m'azeptan en guaires bars, no me dixan ni chugar con os cans (porque talmente yo tienga más garrapatas que no éls).
- Tiengo dreito a casar-me? Estoi que sí, pero no puedo pagar cosa!
- Tiengo dreito a amar? Sí, ixo sí. Pero m'acuerdo que cuan yera normal y os míos amigos beyeban a ixos pobres por as carreras, yeran solos. Bueno, no. I eba uno que iba con una muller (pobra) y siempre chuntos, mesmo se feban besos! y m'acuerdo que les feban asco, y no entedeban que un pobre se podese enamorar. "Será por atra razón, ixo no ye amor, imposible que se quieran" deziban.

No cal estar pesimistas, tiengo toz os dreitos que puede tener una persona normal, pero muitos, muitos, por prechuizios, me son negaus.
Cuan pido diners, porque tiengo que pagar os medicamentos (que tamién me meto malaudo, eh?!) me dizen que no, que marche ta un albergue, mesmo i hai chen que dizen que de diners brenca, pero que me combidan a un bocata en un bar (!!) pero si yo nomás quiero dinero ta ixo. O normal ye que se me miren mal, como dizindo: "ixe que nomás quiere diners ta caxas de Don Simón", y no me den cosa.

A la fin, cuan tiengo o chusto ta pagar o medicamento, he d'asperar-me a que ubran a botica ya de maitins, porque de nueiz, as de guardia, no m'ubren a puerta.

Cuán entenderán a chen que estar pobre no ye estar delincuén? ni barrenau? ni galbán? ni malaudo? ni traficán, drogadicto, biolador, inmigrán, asesino... Encara tenez que ubrir as mens, que no soz tan progresistas ni solidarios como tos pensaz...

Escrito por Charrabís
(2) Comentarios • (0) Referencias • Binclo pernanén

Referencias (URL para referencias)

Comentarios

Chorche Martín, a zaguera estrofa d'o miyo poema de güe charra d'o tuyo blog. A bier si te fa goyo:

http://rimat.blogspot.com/
Garona — 09-07-2005 12:59:06
Prou que m'ha feito goyo!

Tiens razón, "Os chemecos no son banos
si sirben ta protestar."

Toz os días me miro o tuyo blog, creigo que ye una marabilla. Ixo d'estar rimau ye curioso y majo, y o bilingüismo siempre m'ha encantau. Más encara que siga catalán/aragonés!

Suerte con o tuyo blog, que d'aragonés no'n conoxco guaires. A beyer si se fa un buen rete de blogs en aragonés.

"Qui camina china-chana,
fendo camín sin parar,
plega siempre allá an le agana."

Chorche Martín — 09-07-2005 16:17:01