:: O chemeco d'as parolas (en aragonés) ::

O chemeco d'as parolas (en aragonés)

Afogau II

Archibau en Cheneral • Fecha: 07-07-2005 17:56:22

Soluzions?

Ista zaguera nueit no la pasé guaire bien. Trobé un buen puesto ta chazer en a puerta d'un garache que feba cantón con un supermercau d'ixos que tienen sucursals por tot o mundo. Con as caxas y plasticos que i eba, y o periodico de l'atro día, me fazié un buen niedo.

No siempre te dixan dormir tranquilo. Ista begada estió un can que pretó a escañutar en un balcón d'a casa de debán. "Calla-te!" gosé gritar, y una muller amanixió a lo suyo costau. "Clamaré a la polizía" dizió. "Rai, pero que ixo se calle!". A los zinco minutos, bels polizías me fotión una patadeta. "Despierta, ye un puesto pribau". "Pero soi en a carrera...". "Au d'aquí, ya!".

Son as seis d'o maitín, m'estoi aquí, en o banco d'o parque. Tamién ye pribau isto? Estoi que no encara.
No he puesto dormir brenca.

Pero qué puedo fer ta dixar d'estar pobre? A soluzion ye fázil: cosa. En o mundo que bibimos, i hai pobres y ricos, y os segundos esisten grazias a los primers. Nomás pueden ixos d'o G-8 soluzionar os problemas? Sí y no.

Ye un problema más fundo: cada persona quiere bibir millor que o suyo bezino, cada país quiere tener millors armas y millor calidat de bida, cada superpotenzia luita por estar a más poderosa. Ye un egoismo mundial. En Europa, en cuentas de potenziar a solidaridat y o futuro común, i hai luitas por as subenzions, por a inmigrazión, por as luengas, por tot. Cada país preba de tener a millor parte. No beyen que si Europa gana, els ganan?

Podemos fer cosas ta disminuir a pobreza, pero qui más puede fer son os gobernans. Por ixo, aporto dos soluzions. U o G-8 dezide a fabor d'os más nezesitaus, u caldrá creyar un G-6,525,486,603. An cada persona siga una potenzia mundial y pueda dezidir o suyo futuro sin nezesidat te creyer en os "representans d'a umanidat". Asinas, aprenderemos que o egoismo no sirbe ta cosa y o que cal ye treballar chuntos.

Pero como ye una irreyalidat, y nunca se fará (ni que o G-8 se unan ni que toz podamos dezidir), te recomiendo que prenzipies por mercar en productos feitos por os países pobres, como en Intermón Oxfam, y que cuan puedas, apadrines un nino u faigas bel donatibo, que ye poca cosa pero aduya más que no te piensas.

Escrito por Charrabís
(0) Comentarios • (0) Referencias • Binclo pernanén