Laburo España: 250.000 ofertas de empleo

Iglesias nos apoya

Archibau en Notizias • Fecha: 06-07-2005 16:27:55

Un apoyo que nos fa bien contentos

Enchego l'ordenador, me miro a Ziber Rufierta y trobo que o presidén d'Aragón apoya o II Congreso d'a Luenga Aragonesa.

A notizia amanixe en o Diaro de l'Alto Aragón.

Aspero que a soziedat aragonesa entienda a importanzia de tener una luenga tan polida que chemeca por bibir, y no caiga en biellos prechuizios.

Dende aquí, felizito a Marcelino Iglesias por a suya conzenzia lingüistica.

Escrito por Charrabís
(6) Comentarios • (0) Referencias • Binclo pernanén


Referencias (URL para referencias)


Comentarios

  1. Pos no se. D'un que leba apolargando 8 años a Lei de Luengas, no m'en creigo ni brenca ni meya ni zarrapita.

    Un congreso per se no bale ta cosa. Con o que se gasten en logar o Palazio Congresos ta fer-lo, o lunch, as acreditazions y as azafatas podrianos pagar a bels pedagogos ta que fesen un buen metodo d'amostranza de l'aragonés, que no cal amillorar sino que no esiste, sino per o biello y entrañable metodo de Nogara.

    Podrianos pagar a publicazión y edizion ta o gran publico d'es bidios de l'Archibo Audiobisual de l'Aragonés.

    Podríanos mercar a biblioteca d'o difunto Tomas Buesa y leyer d'una bez o misterioso conzello d'aldea, podrianos ir t'a familia Alvar y que mos digan an son as zientos de fichas furtadas d'o E.F.A.

    podrianos publicar en DVD u CD as grabazions en chistabin feitas per Mott a chen granb de mas de 90 añadas feitas en 1969 (sentindo parlar un aragones de parellano a o que se trobo Saroyhandi).

    Podrianos fer un archibo dichital de toz es decumentos de tradizion oral que son replegaus.

    Podrianos pagar a chen ta que fese imbestigazions sobre decumentos que son en as bibliotecas y que no denguno s'ha mirau (fueras de bellas eszeuzions).

    Pero no, se gastaran un amiro diners t'aparentar que fan bella cosa...

    D'estes diglosicos mentals (como Marcel) no m'en creigo punto.

    Fablapensador — 06-07-2005 18:50:14

  2. Podríanos fer muitas cosas, y todas ixas que has dito me parixen bien y cal fer-las (de berdat), pero tamién cal fer una academia que empente un buen modelo de luenga, un modelo azeptable d'ortografía aragonesa de tot, y una union ta toz.

    Si no tenemos buenas ferramientas, o treballo que se faiga será de zaborrers.
    No podemos fer una agulla con astral.

    Cal fer un alazet ta ixo que dizes. L'academia ye un buen paso si se fa bien (que aspero que asinas siga). Y o congreso ye o primer trango ta l'academia.

    Qué en piensas agora?

    Chorche Martín — 07-07-2005 01:05:57

  3. Cal fer todas as cosas que diz fablapensador, pero sin as perras que puede proporzionar o diglosico de Marcel.li, no enantaremos mica.

    L´Archibo Audiobisual de l´Aragonés ye un firme argumento ta demostrar que "os d´a fabla" no nos emos imbentau garra idioma.

    guillén — 07-07-2005 10:04:58

  4. Fablapensador diz muitas cosas con esmo y caldrá aparar as orellas ta todas ellas. Pero no me creigo que calga trigar entre fer-las, ixas, u fer o Congreso.
    O Congreso y l'Academia son prezisos, prou que sí. Y o refirme d'o Gobierno d'Aragón tamién en ye, de preziso, perque sin o Gobierno, l'Academia no tendrá "auctoritas". Y sin una "autoridat" en o mundo de l'aragonés, podremos continar una ixufrina d'años zarpa a la greña per cosas que mos fan espisguardar-mos y en pagas mos adiben, de cabo cuan, dosis de mala folla, que d'ixo siempre en sobra.
    Si Marcelino ha mentiu, caldrá dezir-lo tamién, publicamén.

    Pedro Saputo — 07-07-2005 11:22:38

  5. Soi con o tema de l'Academia á o 100%, pero lo que no me feba goy yera que agora per aber-NOS rezibiu Marcel lo empoderemos y en digamos que ye una mena "d'adalid" de l'aragonés.

    Tot lo que aconsigamos (dende una riunión, a la subenzión t'o Congreso u mesmo una Direzión de Politica Lingüistica) será per l'esfuerzo d'a chen no pas perque Marcel aiga bisto a luz. A ixo me quereba referir, que caldrá estar a la tisba.

    Un siñor que d'un costau ye amagando a encuesta de Llera (per exemplo) y que d'atro te ye dizindo que entadebán con a riunión... pos no se, a lo menos no cal emponderar-lo, masiau, de primeras.

    Fablapensador — 08-07-2005 06:36:49

  6. Bueno, apoyar no ye organizar. Muita chen encara no ha parau cuenta. Sin DGA no bale ta pon o marabilloso congreso. Allora, ta pon se bale o buestro reparto de poder

    Serchio — 11-07-2005 11:38:12


Comentar



Recordar datos




LaInformacion.com lainformacion.com - Medio Oficial de los Premios Bitacoras 2009