O chemeco d'as parolas (en aragonés)

Marcho enta un nuebo blog

Un "adios" a Bitácoras. Foi casa muda!



Dimpués de muito tiempo con problemas d'aczeso con iste serbidor de blogs, he dezidiu d'emigrar enta un nuebo puesto: Blogger. Asinas que ta leyer-me abrez de cambiar de direczión y acudir a:

www.chemecos.blogspot.com

Si tenez feitos binclos enta iste blog, por fabor, cambiaz-los.

En os nuebos Chemecos continaré escribindo y parlando d'as mesmas cosas y con o mesmo estilo, asinas que espero que me continez leyendo como ez feito dica agora.

Ya podez ir-ie!

Nos beyemos en www.chemecos.blogspot.com

Espezial 7: II Congreso de l'Aragonés

Un suenio feito reyalidat



Ayer, día 15 de chulio de 2006, estió a zaguera chornada d'o II Congreso de l'Aragonés. Como ya sabez, un día istorico.
En tenez un mui buen resumen en o blog: Estricalla!!

Michel Metzeltin, d'a Universität Wien y miembro numerario d'Österreichische Akademie der Wissenschaften. Uno d'os grans romanistas que i hai en o mundo y d'os millors baledors de l'aragonés. Charró d'a istoria de l'aragonés, relazions con castellano y catalán, causas de castellanizazión, prozeso de renaiximiento, l'actualidat, a importanzia d'o prozeso normalizador ta fer que no muera: "ya no se pueden fer luitas internas, no i hai tiempo". Una charrada machistral, prou que sí. Amás, dende CharrandoTB.com le faziemos una entrebista que podrez beyer toz.

Se nos dión as puntuazions de cada uno d'os componens d'a Sozcomisión Abaluadera y se leyó a lista de personas que quereban estar academicos. Dos nuebas personas:
Carlos Abril y Manuel Marqués.
Asinas que l'Academia prenzipió con una plantilla de 19 personas que esperemos baiga creixendo con l'azeptazión d'a chen que encara no ha dito que no.
A nota de prensa con as informazions de cada uno d'os miembros de l'Academia nuestra la podez leyer en:
Nota de prensa.

Dimpués, as botazions ta dezidir de fer u no l'Academia. Manolo Castán fazió un discurso tremendo, Chusé Inazio Nabarro, dimpués d'excurar a suya negazión d'entrar en l'academia por problemas personals, dizió parolas prou reprochables. Pero bueno, dimpués Pepe Lera nos emozionó con o suyo discurso (increyible), Dabi Lahiguera, Rubén Ramos, Lluis Xavier Flores continón con ixa ilusión. Santiago Bal charró sin mica bergüeña, Nagore leyó una carta tornando a repetir as suyas condizions (que ya s'eban discurtiu 1000 begadas y s'eba perdiu siempre por mayoría por estar istas intolerables). Dimpués d'o discurso (leyiu, qué triste) de Nagore, toz os congresistas tornón a reconoixer-le a suya importanzia, a pedir-le que azeptase d'estar en l'Academia y a rogar-le que lo pensase.
I abió más interbenzions, Michael Metzeltin (una mica influyiu por a suya unica fuen d'informazión) dezidizó de fer parte d'o parlamento sin saber guaire bien (normal, ye chen que sabe de muitas cosas ye en mil puestos y no ha puesto seguir o prozeso d'a nuestra Academia) o tema que trataba. Dimpués más opinions refirmando l'Academia, a faina de Chuntos y tot como Chabi Crespo y más. Manolo Castán tornó a charrar con ixe buen fer que nomás él tiene, con tranquilidat, animo conziliador, y sinzeridat, pedindo que os que s'eban negau de fer parte de l'Academia se lo tornasen a pensar. Y asinas asinas (perdón si m'he deixau a beluno)
Mesmo a muller de Nagore, sin permiso, defenzió in extremis a o suyo mariu.

Se fazión as botazions, toda la sala con nierbols, encara que cuasi toz os botos yeran SÍ.
O resultau estió fulminán:

- 105 a fabor de l'Academia de l'Aragonés.
- 23 negatibos.
- 5 en blanco.
- 1 nulo.



L'alegría plenó a sala, toz os congresistas en garras aplaudindo y os meyos de comunicazión cubrindo ixe momento unico en a istoria de l'araconés. S'eba aprebau a nuestra Academia, l'Academia de l'Aragonés ya yera un feito. Eba benziu l'optimismo, o buen fer y a responsabilidat de cuasi toz.

Dimpués una larga sesión de parabiens de cuasi 20 representans d'academias, institutos y unibersidaz europeas. (No m'acuerdo de toz, por fabor, qui los sepa toz que lo diga y lo meteré aquí).
Toz istos representans reconoixión esta nueba entidat y nos apoyón y afirmón que aduyarían y luitarían por l'Academia.

Dipués de toda ista zeremonia, Juan José Vázquez y Felipe Pétriz yeran enluzernaus de tot beyendo cómo éls no eban feito cosa.
Juanjo Vázquez, o primero, Bizeconsellero de cultura, tonró a repetir que treballaría o Gubierno de conchunta con l'Academia y dende ya prenzipiarían ista faina.

Felipe Pétriz, dimpués d'un discurso entre comprometiu y comediu, s'atrebió a dezir que pensaba fer que a unibersidat de Zaragoza dentrase en o prozeso fendo una Gramatica Historica de l'Aragonés y creyando una Catedra de Filolochía Aragonesa! Cosa que ya debría existir dende fa años pero que a incompetenzia d'ista chen no ha feito. Istas parolas de Petriz cuento que yeran fruito d'a "enluzirnazión" que l'eba causau toda ixa chen y personalidaz importans de meya Europa afirmando l'Academia y a bergüeña que a Unibersidat de Zaragoza no ese iu nian a una comunicazión.
Esperemos que cumpla as suyas parolas, encara como siempre, no me'n fido guaire d'ixos discursos. Con tot y con ixo, fa 3 años quí pensaba que podría existir una Academia de l'Aragonés?



En a Diputazión Cheneral d'Aragón se fazió a multitudinaria chenta con toz os congresistas, combidaus y bels miembros de l'Academia.



O día remató con una trobada de gaiters y baxada por Independendia dica a Plaza España. Dimpués a Nogará, y dimpués a o conzierto de Biella Nuei an que se charró de l'Academia y puyón a o eszenario bels miembros de l'Academia. Ta rematar, una actuazión d'os Diaples d'a Uerba.
Un día ta recordar.



Ista ye una nueba etapa, a etapa d'a ilusión y o treballo: YA YE O TIEMPO DE L'ARAGONÉS.

Espezial 6: II Congreso de l'Aragonés

A consolidazión en a Uesca nuestra



Prenzipio o resumen con una mui buena notizia que nos plena a toz de goyo.

Pilar Benítez y Óscar Latas han azeptau estar academicos de l'Academia de l'Aragonés.

Ye a saber, os academicos que en serán con seguridat son, a día de güe, istos:

- Anchel Lois Saludas (Barré)
- Juan José Lagraba
- José Lera
- Quino Villa
- José María Satué
- Ana Tena Pui
- Manuel Castán
- Chabier Lozano
- Chusé Aragüés
- Roberto Serrano
- Juan José Segura
- Rafel Vidaller
- Fernando Romanos
- Francho Rodés
- Fernando Sánchez
- Óscar Latas (nobedat)
- Pilar Benítez (nobedat)

En total, 17 academicos (seguros por agora)que prou que pueden fer un buen equipo de treballo ta prenzipiar con l'Academia, encara que con o tiempo puedan, as personas propuestas que a la fin refusasen, tornar a dentrar-ie.
Con tot y con ixo, torno a felizitar a istas personas y, conoixendo-los a toz, asegurar que fan un mui buen equipo de treballo que dende a bariedat podrá plegar en acuerdos.

RESUMEN D'A CHORNADA

Encara que he perdiu a carpeta an que me iba apuntando tot, miraré de fer-lo o millor que pueda. Si me deixo bella cosa mui mui importán, ruego que me lo digaz.

Aprobeito ta comentar que o equipo de Charrandotb.com y chen que quiere aduyar y partizipar en o prochecto somos grabando TOT o congreso con dos camaras: una fixa y un atra móbil. Asinas que prou que amás d'os resumens y notas de prensa podrez, qui no lo beigaz, sentir y beyer o congreso en os resumen que en faimagos por internet en a nuestra web.

Tos recuerdo tamién que Choben en o suyo blog: Estricalla!!, tamién i ye fendo un seguimiento d'o II Congreso de l'Aragonés. Mui bien feito, por zierto.



S'ha inaugurau a sesión y han prenzipiau as ponenzias.

Francisco Fernández Rei, d'a Universidade de Santiagoy l'Instituto da Língua Galega ha parlau d'a istoria d'o galego, o mobimiento de imbestigazión y esfensa y cómo, fa 100 años, prenzipió o recorriu d'a suya normalizazión de traza formal. Os galegos, seguntes nos ha contau, han teniu muitos problemas d'eszisions, luitas graficas, barallas personals y tot ixo (estoi que como en a resta d'academias encara que no lo digan) y tamién ha contau cómo treballan agora de conchunta con o Instituto da Língua Galega. Amás d'abanzar as futuras publicazions y imbestigazions.

David Grosclaude, presidén de l’Institut d’Estudis Occitans, ha parlau d'a reyalidat sozial, politica y mediatica de l'oczitano. D'os suyos problemas por o dialectalismo, d'a relazión luenga-dialecto, d'os metodos ta resolber-lo, d'as publicazions, radios y papers que i hai en oczitano y d'o problema d'a manca de profesionals paraus ta treballar como periodistas en oczitano.

Óscar Latas y Pilar Benítez han charrau dende un punto más soziolingüistico d'as perzepzions, caracteristicas, comunidat y pensamientos d'os ansotanos. D'a suya poblazión y o estau de l'aragonés, d'a conzienzia que tienen que os dialectos de l'aragonés son "chermans feitos en a mesma fornada" (u bella cosa asinas, que lo foi de memoria) y d'a nezesidat de continar enta debán.

Fernando Sánchez ha charrau d'o estudio fundo que ye fendo chunto con Guillén Tomás de l'aragonés d'Agüero, d'as caracteristicas d'iste tano foneticas como morfo-sintacticas asinas como d'a nezesidat de fer un estandar basau más en estos parlars meridionals, mui regulars y comuns, y deixar de una begada dezaga os localismos que se feban serbir dica agora. Ye dezir, una charrada curta pero densa en a que s'ha descrito tot o suyo estudio de muitos años.

Chorche Díaz nos ha parlau d'a nezesidat d'unas normas graficas diferens si se quiere fer que toz os dialectos de l'aragonés se i sientan representaus. Tot isto prenendo d'exemplo o benasqués, modalidat bien diferenziada d'a resta de l'aragonés que ha menester de bels cambios en a grafía de l'aragonés ta refleixar-se-ie. Una propuesta ortografica tradizional que opta por o progresismo.

Guillermo Camallonga ha parlau d'as posibilidaz de plegar a o bilingüismo deseyable de l'aragonés por meyo d'una serie de propuestas y linias a seguir asinas como d'o modelo catalán. Fendo un repaso por a situazión actual y o futuro marco lingüistico de treballo grazias a l'Academia que s'establirá ya maitín (encara no me lo creigo, qué momento istorico).

Natxo Sorolla ha charrau d'a situazión d'as luengas aragones, castellano y catalán en bellas zonas d'estudio an que combiben. D'as interferenzias, datos estadisticos, prebisions que se'n puede sacar (que i hai buena beta) y una balorazión d'a situazión de diglosia de l'aragonés que prou que cal soluzionar.

Henrike Knörr, de l'Euskaltzaindia y Euskal Herriko Unibertsitatea nos ha parlau en a suya ponenzia d'as caracteristicas d'o euskera, d'a suya eboluzión, dialectos y conserbazión, d'a progresión que se ha feito en a suya ortografía, d'os problemas ta chuntar a toz os dialectos en una luenga mai y d'os nexos que ista luenga teneba con atras como l'aragonés en a parte de Roncal.

Ta rematar, s'ha agradeixiu o refirme d'o manifiesto a buena cosa d'instituzions, consellos y comarcas. S'ha leyiu, y s'ha contau con a presenzia de representans de muitos conzellos, de l'alcalde de Uesca y d'o presidén d'a Comarca d'a Plana de Uesca qui han feito discursos en fabor d'a "nuestra lengua" y d'a nezesidat de protecher-la como cal.

Bueno, isto ha estau tot: a consolidazión d'o prozeso con l'apoyo o consello d'atras academias y una begada más un día de bictoria de l'aragonés por tener tantos refirmes. Esperemos que maitín tos pueda contar buenas notizias y que l'Academia se faiga como cal, con una mayoría de congresistas que deseyan un millor futuro ta la luenga, con o SÍ A L'ACADEMIA DE L'ARAGONÉS!!!



Grazias a toz. No podemos reblar.

Espezial 5: II Congreso de l'aragonés

A sabor d'a ilusión y a faina bien feita



Güe, día chuebes 13 de chulio d'o 2006, ha prenzipiau este acto istorico tan esperau dende fa 30 años que suposa un nuebo chiro de l'aragonés: o II Congreso de l'Aragonés: o chiro enta un futuro millor.
He de reconoixer que me fa mui contento de poder escribir estas líneas aquí. Esto ye, ta una persona que creye y treballa por esta luenga, una fita mui importán que dende que prenzipió, badín vadiando, ha puesto arribar a estar una reyalidat.

RESUMEN D'A CHORNADA

A las 9:30, en o salón d'actos d'o Gubierno d'Aragón, Juanjo Vázquez, Bizeconsellero de Educazión Cultura y Esportes, en representazión de Marcelino Iglesias y s'ha leyiu a carta d'o Presiden d'Aragón. Ha parlau d'a nezesidat de salbaguardar l'aragonés y promober-lo asinas como d'a suya importanzia, ha deixau claro que, como caleba fer en o discurso ofizial, o Gubierno d'Aragón no tiene cosa a beyer con este prozeso y mesmo ha aclarau o tema legal. Pero a l'inte ha reconoixiu que tanto o Gubierno y l'Academia abrán de treballar chuntos, y malas que se constituiga l'Academia, prenzipiará esta dinamica de treballo.



Dimpués, Manolo Castán, o Presidén de Chuntos por l'Aragonés ha feito un repaso d'a faina d'a Comisión Organizadera, de totz os suyos logros, y d'as nezesidaz que en cara i hai por debán. Con él, feban parte d'a mesa Fernando Sánchez, Chusé Inazio Nabarro y Francho Beltrán.

Joan Veny i Clar, de l'Institut d'Estudis Catalans y Universitat de Barcelona, ha charrau d'a istoria d'a normalizazión catalana y de l'actual preocupazión por fer coexistir sin minusbalorar os rechionalismos con a norma, establindo dos normas: una oral y un atra escrita.

Peire Bec, de l'Université de Poitiers, Institut d’Estudis Occitans y Association Internationale d’Etudes Occitans, ha charrau d'a situazión d'o gascón, as diferenzias entre este dialecto y a resta de l'oczitano, en ha dito bels exemplos y dimpués ha charrau d'as coinzidenzias romanicas y pirenencas con l'aragonés, catalán y mesmo castellano, y ta rematar ha feito constar cómo funziona o sistema grafico de l'oczitano y as suyas caracteristicas.

Miguel Ramos Collada, Bizepresidén de l’Academia de la Llingua Asturiana y d'a Universidá d’Uviéu, ha charrau d'a istoria de l'asturiano, d'a suya literatura, d'a suya sustituzión por o castellano y de la suya actualidat amás d'explicar as fainas de l'Academia.

Bernat Joan, eurodiputau actualmen, ha charrau d'as academias y funzions, d'a grafía, d'a nezesidat de dotar a l'aragonés d'esta Academia y d'instituzionalizar a luenga.

Artur Quintana ha charrau de l'aragonés de Sercué (ixa parla de l'aragonés tan bonica y de bez tan rara) y d'as suyas caracteristicas: sonorizazions, conserbazión d'as oclusibas sordas, sintaxis y ha rematau con a situazión d'ixa parla, ya cuasi muerta por desgrazia.

Rosa Berceo ha parlau d'a situazion soziolingüistica de l'aragonés d'Ayerbe. De cómo cal abordar o problema d'a manca de reconoixminiento d'os mesmo parlans, y d'a posibilidat de poder, encara, conserbar esta modalidat.

Lluis Xavier Flores y o suyo acompañán han charrau d'a eboluzión frafica dende a tradizión mediebal dica l'actualidat que se fa serbir una norma fonolochica coinzidente como fan o extremeño u l'andaluz. Y ha señalau as diferens propuestas graficas actuals, dica a zaguera d'a SLA. S'ha decantau por que cal un cambio enta una grafía más tradizional y coderén.



A la fin, s'ha feito a botazión d'o estatutos d'a futura Academia de l'Aragonés. Ántes con un chicot debat an que bel par de congresistas han feito alegazions y criticas d'o prozeso y tot; pero a resta de congresistas chunto con os "pesos pesaus", con unanimidat, lo han defendiu contundenmen refusando una por una as acusazions y esclareixendo a berdat.

Pasau sin problemas ixe inte de discrepanzia, as botazions s'han feito con normalidat y o resultau ha estau abrumador con un refirme inigualable que ha remarcau a fe y unidat mayoritaria en l'Academia:

- 101 botos a fabor d'os estatutos.
- 8 abstenzions.
- 15 en contra.

Tot s'ha rematau con una autentica obazión, plena d'ilusión y estusiasmo de toz os congresistas en a sala.



Quiestos lectors y amigos:
PAREIX QUE O SOL NAIX D'ENTRE AS BOIRAS.

Especial 4: II Congreso de l'aragonés

Academicos que han aceptau d'estar-ne.



Bien, pues una mui buena notizia en tiempos de taquicardias: as personas que han azeptau estar academicos a las 14:30 de güe.

Quiero resaltar bel par de cosas:
- A increyible azeptazión que ha teniu entre os parlans maternos. I hai representazión de chesos, sorbrarbeses y ribagorzans. Nombres con representatibidat, conoiximientos lingüisticos, y boluntat de treballo y consenso. Que ye o que cal en l'Academia.
- Total representazión d'o mobimiento de recuperazión de l'aragonés que no ye materno. En este sentiu, i hai personas capazitadas, treballaderas, buens imbestigadors y chen actiba en l'actualidat.

Anchel Lois Saludas (Barré) - Por o belsetán.

Juan José Lagraba - Por o cheso.

José Lera - Por o cheso.

Quino Villa - Por o chistabín.

José María Satué - Por o sarrablés.

Ana Tena Pui - Por o baixo-ribagorzano.

Manuel Castán - Por o rib. benasqués/patués.

Chabier Lozano - Imbestigador multidialectal.

Chusé Aragüés - Editor y traductor.

Roberto Serrano - Por o chistabín.

Juan José Segura - Imbestigador cheneral.

Rafel Vidaller - Por o somontanés.

Fernando Romanos - Imbestigador multidialectal.

Francho Rodés - Imbestigador multidialectal.

Fernando Sánchez - Imbestigador multidialectal.

Como beyez, una academia que ya podría estar parada ta prenzipiar a treballar con buen nibel. Ixo sí, encara que ya me fan contento estos "fichajes", cuento que encara debría d'aber bel par de personas más. Y no soi pensando en Francho Nagore, no. Esperemos que a chen que encara no ha dito ni que sí ni que no beiga y entienda a importanzia d'ir dando trangos enta debán y dezida de fer parte d'un prozeso istorico que ya no se puede aturar y ye o futuro d'a luenga.

Respeto, umildat y responsabilidat, por fabor. Cada persona ye una alfaya ta l'aragonés.



Bueno, felizidaz a os academicos que han azeptau esta responsabilidat. Seguro que lo farez chenial, soz un buen equipo de treballo. Enhorabuena a toz.

Espezial 3: II Congreso de l'aragonés

Zagueras informazions.



Tristement, he de fer-vos pública esta nota de Chuntos por l'Aragonés en respuesta a un acto d'o IEA que como minimo ye vergüenyoso de tot. A nota diz:

Compañers y compañeras d'a Comisión Organizadera, compañers y compañeras congresistas:

Ayer, 11 de chulio de 2006, o Instituto de Estudios Altoaragoneses fazió publica una nota de prensa en a que se desbincula d'o II Congreso de l'Aragonés. Tos pencho como documento adchunto a nota que ha feito publica l'achenzia EFE. Debán d'a situazión creyada, a Chunta Direutiba de Chuntos por l'Aragonés quiere informar-tos d'o siguién:

A Chunta Direutiba de Chuntos por l'Aragonés (Comisión Organizadera d'o II Congreso de l'Aragonés) quiere fer sabedors a toz os congresistas que as afirmazions que podemos leyer en a nota de prensa feita publica por o Instituto de Estudios Altoragoneses (I.E.A.) no s'achustan a la reyalidat. Encara que ye zierto que no ye estau posible inscribir una asoziazión que se clame "academia", no ye brenca zierto que no se pueda constituir l'Academia de l'Aragonés, nombre que podrá emplegar l'Academia que naxca en o II Congreso porque Chuntos por l'Aragonés tiene a marca rechistrada. Dende o punto de bista legal una asoziazión, como Chuntos u o nombre que l'Academia dezida, dará cobertura a l'Academia de l'Aragonés.

Respeutibe a l'afirmazión que o IEA fa de que Chuntos ha ofrexiu informazión de manera "imprecisa, escasa y sesgada", tamién emos de manifestar o nuestro más absoluto desacuerdo porque o treballo de Chuntos ye estau trasparén en tot momento. En tot momento s'ha transmitiu a toz os congresistas, como sabe, a informazión por meyo de las zirculars y, antimás, s'han feito publicas en a nuestra pachina web todas as autas d'as reunions. En ixa pachina web i ye toda a informazión de que disposa Chuntos por l'Aragonés.

Ta rematar queremos manifestar que en a comisión i son representadas muitas asoziazions y bella instituzión, como o IEA. Cadaguna d'estas asoziazions u instituzions tiene como minimo un representán en a Comisión, encargau de fer plegar a suyas inquietuz y, de bez, de trasmitir a ixas asoziazions u instituzions tot o tratau en as reunions de Chuntos. Creyemos que en o caso d'o IEA, Francho Nagore Laín, no l'ha feito plegar con fidelidat o debatiu y l'aprobau en as reunions de Chuntos. Nomás en ixe caso puede entender-se l'autitut presa por o IEA en estos momentos cruzials ta la nuestra luenga.

En tot caso, tos animamos a toz os congresistas a partizipar actibamén en o Congreso y que iste siga un esito total.

A Chunta Direutiba de Chuntos por l'Aragonés


Amás, Fernando Sánchez, secretario de Chuntos por l'Aragonés, pide "responsabilidat a toz os congresistas por o bien de l'aragonés".

A nota de prensa la podetz leyer en Nota de prensa

Espezial 2: II Congreso de l'aragonés

Meta: una Academia de l'aragonés para toz



Como ya sabez, a meta de tot este treballo de año y meyo ye establir una Academia que chunte a toz: sensibilidaz, asoziazions, administrazión y unibersidat.

RECONOIXIMIENTO

- Por agora, fueras d'a Sociedat Lingüistica Aragonesa, que no han quiesto fer parte d'a fundazión de l'academia, todas as sensibilidaz i son representadas. Encara que mesmo dentro de chuntos, bel personache sía dando ferrete y tal. Bueno, como diz o topico, esto ye normal d'os aragoneses, a incapazitat de plegar en acuerdos.

- Todas as asoziazions, fueras d'a devantdita SLA, fan parte d'a creyazión de l'academia. Muitas asoziazions de l'Alto Aragón, chen particular, foranos... lo podez beyer en www.laragones.com, escritors importans, filologos, estudians...



- As administazions son as que suposan a cara y cruz d'o prozeso. Muitos ayuntamientos y comarcas tanto de l'Alto Aragón como d'a resta d'a comunidat ha apoyau o manifiesto.
I hai chen que argumenta que apoyar un manifiesto no ye apoyar una academia... pues no ye o mesmo, prou que no, pero toz sabemos que ye un trango que nunca antes s'eba conseguiu. Reconoixer tanto como se diz en o manifiesto implica a predisposizión a reconoixer l'academia. Amás, cómo ban a reconoixer una academia antes de constituir-se? Ixe no ye argumento.

O punto malo: Si ayuntamientos y comarcas nos apoyan, o nuestro gubierno no reconoixe explizitamén l'academia.
Sobre iste tema, caldría parlar-ne muito. Nomás daré unas lineas ta que lo considerez:
*O gubierno ha estau incapaz de fer una lei de luengas en condizions.
*O gubierno ha estau incapaz de nombrar l'aragonés en o estatuto.
Pero:
*O gubierno no reconoixe l'academia en primeras. Si bien tot s'irá fendo.
*O gubierno ha dau muitos diners ta que se faiga o congreso, ha permitiu que se faiga en a suya siede: a DGA, y beyen con buena cara o prozeso y a futura academia.

Estoi que, malas que l'Academia prenzipie a treballar y se pueda abaluar a suya faina obchetibamén, as cosas serán más fázils.



- Por último, a Unibersidat ha rechazau por agora dentrar en l'academia. Esta meta yera cuasi imposible conoixendo a os "nuestros" catedraticos. Que cal recordar que no son de filolochía aragonesa sino d'hispanica. Y toz conoixemos de qué piet coixían... Puede estar que con más tiento s'ese lograu bella cosa, pero por agora no s'ha puesto. Ye probable que, si l'academia funziona correctamén, este tema se pueda soluzionar.

En resumen. No s'ha lograu tot o que s'esperaba, pero s'han conseguiu pasos increyibles nunca antes feitos. L'academia puede naixer con un apoyo de parlans d'aragonés materno nunca bisto y como una ferramienta normatiba con un reconoiximiento asoziatibo como cal. Yo creigo que ye millor para l'aragonés ir fendo chicoz trangos que no aturar un prozeso que, si no se culmina, suposa o caos y a muerte más amanada d'a luenga. O boto SÍ a l'academia, en este sentiu, ye a millor soluzión dentro d'a situazión actual de l'aragonés.

Espezial: II Congreso de l'aragonés

Prenzipia una semana d'infarto.



Güe, día lunes, prenzipia este espezial preparatorio ta o II Congreso de l'aragonés empentau por Chuntos por l'aragonés.

Ye una fita mui importán, istorica, ta l'aragonés que, dimpués de prous años, cuasi todas as fuerzas y tendenzias que i hai en ista luenga miren d'achuntar-se y salir d'acuerdo con una academia ta toz.

Esta serie espezial en o mío blog irá informando, día por día, d'as caracteristicas, programa, ebentos más importans y ya, dentro d'o congreso, d'a suya eboluzión, clausura y resultaus.


Agora toca de fer un breu resumen de tanto como ha ocurriu dica güe y d'o que s'ha feito ta poder plegar en este momento:

En chinero de 2005 se fazió una reunión en Uesca ta empentar un manifiesto que dende alabez ha puesto tener muitos apoyos y refirmes.
Se estabió una Comisión Organizadera conformada por todas las personas que en queresen fer parte amás d'as asoziazions. Ixa comisión teneba como unica funzión a creyazión d'un congreso que constituiría l'academia.



En este año y meyo s'han iu fendo reunions por toz os puestos de l'altoaragón mirando d'imbolucrar a las personas, asoziazions y autoridaz d'ixos territorios y dando trangos enta ista semana.

Una labor ardua y de mal fer que prou que ha teniu foraus y puntos negros. Pero tamién ha serbiu ta charrar, ta fer nuebas amistaz, ta fixar as metas, y ta descubrir as error que s'eban feito antes d'esto.

En zagueras, ha estau un prozeso complicau, con un atra posible lei de Luengas que no s'ha feito, con una Academia de la Luenga aragonesa falsa, con personaches que han mirau, sin bergüeña, de crebar esta meta istoria. Pero a la fin, un prozeso que ha plegau en a suya zaguera fase: Un II Congreso de l'aragonés que tiene en as suyas más aduyar a salbar una luenga u aduyar a matar-la.

Congresistas, miembros d'a Comisión, sozios d'as asoziazions, soziedat en cheneral: ESTA YE A SEMANA DE L'ARAGONÉS. SUERTE.

Prenzipiamos con o CAMPÉS

Prenzipia a imbestigazión de l'aragonés ribagorzano campés



Fernando, Rubén y yo (en primeras), como imbestigadors por parte de Nogará, emos prenzipiau ya as imbesigazions de l'aragonés ribagorzano campés. En concreto, por os dos lugars más oczidentals: Senz y Víu, y un poquet de Campo.

Yera una zona que ya fa más de dos años que Juanjo Segura y Fernando Sánchez eban imbestigau, pero agora se prene ixe treballo con más ganas y con aduya d'a DGA ta poder fer un estudio fundo d'ixa zona que, encara que cuenta con chen importán como Bienvenido Mascaray, no ha teniu un lugar destacau en os estudios filolochicos de l'aragonés.



O día domingo pasau, estiemos en Senz, Víu y Campo. Un día chenial, feba calor y sol (masiau) pero con tot y con ixo, se yera millor que en Zaragoza.
Prenzipiemos por Senz an que bisitemos bel par de casas que Fernando y Juanjo teneban ya bisitadas. Estiemos fendo grabazions y a berdat ye que un aragonés mui majo o de Senz. Dimpués en Víu, an que ya me quedé mui contento d'o bien que charraban (i hai bel par de diferenzias minimas). A chen mui maja, con conzienzia de charrar en aragonés y con ganas de continar fendo-lo y aduyar-nos en as imbestigazions. Dimpués, baixemos ta campo an que estiemos sentindo una combersa entre chen d'o lugar de tot en aragonés muito rato.



A la fin, un mui buen día que prou que abremos de repetir a sobén ta ir fendo una buena imbestigazión.
A la chen de Campo y redolada que me leigan, un saludo!!!

Tos animo a que istos días de berano faigaz as buestras incursions, ixos que podez, en a imbestigazión de l'aragonés bibo. Tos fará goyo, y dende asoziazions como Nogará u cualsiquiera, tos podrán apoyar y orientar.

Nuebos bideos en CharrandoTB.com

En i hai de tot y ta toz



CharrandoTB.com ha puesto replegar atros dos bideos más ta la suya colección:

Ulut:
Bideo d'o conzierto d'iste choben grupo de mosica hard-core que cantan en aragonés. A canta ye: Espiellos, beires y fierros.
Qui nomás podaz sentir mosica clasica, no tos lo mirez...

Ansotano:
Bideo feito por Quino Villa dende a obra "Recuerdos de l'onso Chorche", escrita por ninos d'Ansó.
Ye mui bien y un claro exemplo de cómo, encara con pocos recursos pero con ganas, se pueden fer autenticas marabellas por a luenga ista.

Espero que los beigas fendo uns güellos como los feba yo!

Cozierto en o zentro d'a ziudat.

L'aragonés torna a fer parte d'o zentro d'a ziudat



Ista nueit, en o Casco Biello de Zaragoza, s'ha puesto tornar a sentir aragonés.
Por estar as fiestas d'o Gancho, se ban fendo conziertos de diferens tematicas y ista begada le ha tocau a la mosica aragonesa.

Entre atras cantas, s'ha puesto sentir mosica en aragonés d'a Ronda de Boltaña, Ixo Rai y a clasica "S'ha feito de nuey".

Una buena nueit de mosica ta prenzipiar o berano en uno d'os bicos más pobres d'a ziudat. Que se contine asinas.

Numero 17 d'o Espiello

Una rebista que cal leyer!



O espiello, a rebista de publicazión periodica de l'Asoziazión Cultural Nogará, ya tiene una nueba tirada en a carrera. Ye o numero 17.
Ista "rebista d'autualidat de raso en aragonés" ye, en a mía opinión, a millor rebista en aragonés tanto por l'aragonés que se i fa serbir, como por a maquetazión y a tematica cheneral, en Aragón.

En iste numero, i trobarez chunto con as seczions de siempre (notizias, cuentos ta ninos, chuegos...):

- Resumen d'as "13enas Chornadas d'as luengas d'Aragón" feitas por Nogará en colaborazión de Chuntos por l'aragonés
- Reportache: "Dezaga d'o Yeti pirenenco" por Óscar Lerín.
- Reportache: "A luenga, más que un meyo de comunicazión" por Chorche Pellejero .
- Entrebista: "O Centro Aragonés de Barcelona. Casa de Aragón", por Jacinto Bello, Cruz Barrio, Silvia Pérez y Alberto Lamora.
-Reportache: "La istoria de Yuri Gagarin" por Sergio Mur.
- Zienzia y tecnolochía: "Isaac Asimov" por Carlos García.
- Zienzia y tecnolochía: "A primera botella biodegradable d'o mundo" por Rocío Montañés.
- Reportache: "O esquinazo y a fisioterapia" por Dabí Anquela.
- Guillén Tomás, Sergio Mur y Chusé Ramón Barrios entre atros s'encargan de comentar Discos, nobedaz editorials, zine y conziertos.
- Gramatica aragonesa: "Emplegos d'o berbo fer en aragonés" por Choche Díaz como resumen d'a charrada que en fazió Fernando Romanos en Nogará.

En fin, una mui buena rebista con muito treballo dezaga que mira de fer que l'aragonés cuente con un meyo de comunicazión que pueda achuntar todas as tendenzias y tematicas en una mesma publicazión.

Tos la recomiendo ta prenzipiar o berano bien informaus!

Zaguera reunión de Chuntos por l'aragonés

Un buen treballo ta una buena Academia



O pasau 24, día sabado, se fazió en Echo a zagera reunión de treballo d'a Comisión organizadera d'o II Congreso de l'Aragonés.
L'alcalde Luis Gutierrez les dió a bienbenida en cheso y se treballó tot o día con ganas de plegar en os obchetibos y fer o millor congreso que se pueda.

Tamién s'ha pasau ya d'as 4000 firmas a o manifiesto de Chuntos, y multitut de conzellos, comarcas y asoziazions lo han refirmau tamién.



I hai que destacar que iste II Congreso ye creyau dende as tres asoziazions más populars que treballan por l'aragonés: Nogará, Ligallo y Consello, con unidat y con ganas de cambiar as cosas enta millor. Amás, en ha puesto chuntar muitas más que son fendo tamién de conchunta tot o que pueden por o naiximiento d'a nueba Academia. En a foto podez beyer a bels miembros d'a comisión y futuros academicos.

Felizidaz a os miembros d'a comisión por o suyo treballo, que encara que cuento que ye pesau y mui duro, a la fin se fará una academia como cal grazias a busatros y as buestras asoziazions.

Nuevo blog en aragonés:

Plega de naixer y ya quiere estricallar!



Estricalla ye o nuebo blog amaneixiu en aragonés que naixe, pareixe, con muita fuerza. Choben, o suyo fedor, diz que s'actualizará a sobent.
Prou que no dudamos que o suyo nombre de guerra ye representatibo d'a suya linea critica, seguro que nos soprende con buena cosa de articlos d'opinión bien feita.

O suyo aragonés, dentro d'o estándard, ye correcto y amás no fa serbir ixas "curiosidaz" que encara i hai chent que escribe como comuns. Contina asinas.

Espero que tos faiga tanto goyo como a yo m'ha feito de beyer cómo se fan más blogs en aragonés dimpués d'una etapa que no ye estando guaire buena ta ista "luenga" en internet.
T'adibo en os míos binclos!

Suerte, choben estricallador.

Concierto de lo Fabirol

Espurniando, pero muit bien. Notizia en aragonés medieval.



Sí, huei, la Orquestina del Fabirol, en la plaza Sant Bruno, canto la Seu de Çaragoça, han feyto un concierto que ha rematado espurniando un poquet, et no porque cantassen mal, pro que no! (encara que se sentiva una miquinina mal do que yo yera los sonidos) sino porque parexe que lo río d'Ebro menesta d'agua et aqueste yera lo millor día por plenar-lo. Et aquesto ye porque huei Ebro feva una pudor et eva una color desde'l matexo Puent de Piedra...

Bueno, pues muit bien, la gent ha dançado et blincado con la suya mosica et todos nos ne emos feyto buen solaç, mercet de Dieus.
Más encara por fer-se en un mercado medieval como los de la Edat Meya, con "boiras de carambelo", con botigueras parlando por lo mobil et con bel auto baxando per meitat de la carrera. Aquexo sí que ye medieval de tot!
Ireth en lo suyo blog, en romanz de Castiella, nos comenta también un poquet lo día de lo mercado et cómo aquesto por cada día ye más comercial et menos autentico.



Las cantas muit bien, tanto de Ninonaninón como un repaso por la suya discografía pora rematar con Cucaracha o Bandolero. A veyer si continamos veyendo cómo los jovens et grants, gent d'aquí et inmigrants et totz en general se'n regalan de la orquestina como se'ndy regalavan huei. Espero tornar a sentir-los luego (et que vosotros también los sintades). Un saludo, Roberto, lo fez muit bien!

Et ja más enta la nueit ha tocado Mallacán por lo bico de la Magdalena. Pero no hi podeva ir, assi que si cualque lector hi yera, que nos lo romaníe, si vos plaçe.

Ta buscar

Categorías

• Cheneral
• Formazión d'imbestigadors
• Notizias
• Opinions

Binclos

Pachinas

• Charrando.com
• L'aragonés

Blogs en aragonés

• O chemeco d'as parolas NUEBO

Archibos

• Marzo 2008 (0)
• Julio 2006 (12)
• Junio 2006 (9)
• Mayo 2006 (6)
• Abril 2006 (9)
• Marzo 2006 (14)
• Febrero 2006 (7)
• Enero 2006 (11)
• Diciembre 2005 (23)
• Noviembre 2005 (18)
• Octubre 2005 (22)
• Septiembre 2005 (17)
• Agosto 2005 (11)
• Julio 2005 (21)

Sindicazión

• RSS 1.0
• RSS 2.0
• Atom